Ang mga pasalig

Hangtod karon, nagpaabot pa gyod si Mark Anthony Fernandez kon kanus-a tumana ang pasalig ni Mother Lily nga buhatan siya og usa ka project kon makagawas na siya sa Bicutan.

Matud pa ni Mark Anthony, kon saligan siya, kon dunay mosalig kaniya nga director, ipasalig pod kuno niya nga magtinarong na gyod siya og dili na niya buhaton ang gihimo niya kaniadto sa nagumon pa siya sa gidili nga mga drugas nga maoy nakapahimo niyang hambugero ug init og ulo.

Matud niya, kon iyang mahinumdoman ang iyang nahimo kaniadto nga hasta ang iyang mga director hagiton niya'g away ug iyang singkahan, mauwaw siya sa iyang kaugalingon. Karon matud niya, "humble" na kuno siya ug dako ang iyang pagpasalamat sa iyang asawa nga bisan sa krisis, nagpaluyo gihapon kaniya ug karon, nakaingon siya nga pamilya ra gyod diay ang makalahutay sa bug-at kaayong suliran sa kinabuhi og dili laing tawo. Mawagtang ang pipila ka kahigalaan, kon bug-at na kaayo ang imong mga suliran.