Nanglayas na

Karon nasayod na ko kun ngano nga migara pag-ayo ang mga sidewalk vendors nga daghan kanila mga Muslim nga gikan sa Mindanao atol sa administrasyon ni kanhi mayor Tomas Osmeña.

Abi ninyo og ngano? Nagsalig sila nga dili moestrikto kanila si Osmeña kay gihatagan man kini og “honorary title” nga pagka Sultan sa mga Muslim dinhi sa Sugbo.

Karon kay dili na man si Osmeña ang mayor, napugos sila sa pagduko na lang. Kaniadto, pastilan, ihikyad nila ang mga baligya diha sa aseras nga agianan sa mga tawo ug kun masabdan, masuko pa.

Nakadungog ko nga kadto nanglalin sila dinhi sa Sugbo atol sa kagubot didto sa Marawi City ug ubang bahin sa Mindanao.

Dasigon nako si Raquel Arce, ang kugihan kaayong hepe sa PROBE Team nga ipadayon ang kampanya sa pagpahapsay sa atong mga aseras maam. Kon mahimo, ibalik ang mga aseras sa ubay-ubay’ng mga dapit dinhi sa dakbayan, ilabi na diha sa Taboan district.

Kun mapahapsay sa administrasyon ni Mayor Edgardo Labella ang siyudad, unya mamenos-menos ang problema sa traffic, dayon masulbad ang problema sa baha ug lunop, bana-bana nako, lisud na siyang mapilde.

Apan usahay lang kay malimtanon ra kaayo si Mayor Labella, o kaha gituyo lang gyud niya ang paglimot-limot sa uban niyang mga gipangsaad.

* * *

Ang maayong himoon ni Mayor Labella mao nga gamiton niya si Vice Mayor Mike Rama alang sa beautification project dinhi sa dakbayan. Dili malalis nga kana si Rama naglantaw gyud sa kahapsay sa siyudad.

Si Rama angay usab nga hatagan og “executive function” aron hingpit kini nga makaabag sa mayor sa mga gimbuhaton niini, ilabi na nga daghang mga adlaw nga si Labella wala dinhi sa Sugbo.

Kun ako lang ang pagbut-on, dili ko gusto nga si Labella mohupot pagka chairman sa League of City Mayors sa nasud, kay dugang kini nga makapa-busy niya.

Kini maoy rason nga kaniadtong miaging mga adlaw, nalooy ko ni Labella nga wala sa kapiskay sa panglawas tungod sa grabeng kakapoy.

Mao nga kinahanglan gyud nga gamiton niya ang mga tawo nga iyang kasaligan. Aw, basin kon kuwang og pagsalig si Labella ni Rama.

Sama sa pagsulbad sa trapiko pagka karon, balikon nako ang akong sugyot nga kinahanglang ibanan ang mga parking area sa daplin sa mga karsada.

Nakaagi ko sa dalan V. Gullas gikan sa D. Jakosalem ngadto na sa Manalili, pwerteng daghana nga mga motorsiklo ug sakyanan nga giparking sa matag kilid sa karsada.

Dako kaayong pangwarta ang gihimo niining pribadong kompaniya nga gigamit sa siyudad sa pagpangolekta sa parking pay.    Angay kini nga undangon na ug ibalik nga ang CITOM na lang ang mangolekta.