17 wanted persons nasikop sa CCPO

CEBU, Philippines — Kapin sa 100 ka indibidwal ang nadakpan sa lain-laing anti-crime operations sa Cebu City Police Office (CCPO) gikan Oktubre 19 hangtod 25, diin P619,956 nga kantidad sa gituohang shabu ang nasakmit.

Ubos sa pagpangulo ni Police Colonel Ricky C. Sumalde, 17 ka wanted persons ang nadakpan, lakip ang 12 ka ubang wanted persons ug lima ka most wanted persons.

Sa kampanya batok sa ilegal nga droga, nakahimo ang kapulisan og 51 ka operasyon nga miresulta sa pagdakop sa 52 ka indibidwal ug pagkasakmit sa gituohang shabu nga nagkantidad og P619,956.

Narekord usab ang 12 ka operasyon batok sa loose firearms, diin pito ka indibidwal ang nadakpan ug 13 ka armas ang nasakmit o boluntaryong gitugyan.

Sa kampanya batok sa ilegal nga sugal, 52 ka indibidwal ang nadakpan sa 28 ka operasyon, diin P5,112 nga pusta ang nakumpiskar.

Samtang, sa ilawom sa CCPO Safer Cities Initiative, 538 ka kaso sa pag-inom og makahubog nga ilimnon sa publikong lugar ug 397 ka kaso sa pagpanigarilyo sa publikong lugar ang natala.

Narekord usab ang 390 ka indibidwal nga naglaag sa kadalanan nga walay pang-ibabaw nga sinina ug 42 ka paglapas sa gitugot nga oras sa pag-operate sa karaoke.

Miabot sab og 669 ka menor de edad ang nahipos tungod sa paglapas sa curfew.

Sa pagpatuman sa mga ordinansa sa trapiko, 552 ka kaso ang natala. Laing 604 ka indibidwal ang gipamultahan, samtang 2,003 ang gipasidan-an o gibuhian.

Matud sa CCPO, magpadayon ang ilang mga paningkamot sa pagpatuman sa balaod ug mga ordinansa aron mapalig-on ang kalinaw  sa dakbayan. IBM BANAT NEWS