PMS-Cebu:  Misaway ug nagduda kang Marcos

CEBU, Philippines — Mga militanteng pundok nga Partido Manggagawa-Sentro Cebu ang misaway sa ikalimang State of the Nation Address (SONA) ni Presidente Ferdinand Marcos Jr., kay giingong mas nakapokus sa ayuda ug subsidiya kaysa sa reporma alang sa trabaho ug ekonomiya.

Matud ni Partido Manggagawa-Sentro Cebu spokesperson Dennis Derige, ang ayuda dili mahimong kapuli sa lig-on nga trabaho, patas nga sweldo, ug mga polisiya nga motubag sa kakabos ug kawalay kasigurohan sa panginabuhian.

Gisaway usab sa grupo ang kakulang sa diskusyon bahin sa pagtapos sa kontraktuwalisasyon, dakong wage increase, public employment program, ug industriya nga makamugna og kalidad nga trabaho.

Gisuportahan hinuon sa grupo ang pagpalapad sa tax exemption alang sa middle class ug ang pagpalig-on sa PhilHealth, apan nanawagan nga kinahanglan usab og dugang pundo ug mas lig-on nga serbisyo publiko.

Sa enerhiya, giila sa grupo ang lakang batok sa pagpasa sa system losses ngadto sa konsumidor, apan gikuwestiyon nila ang political will sa administrasyon sa paghimo og mas lawom nga reporma sa EPIRA ug pagsulbad sa mahal nga presyo sa kuryente.

Apil sa ilang gipadayag nga kabalaka ang paghisgot ni PBBM sa nuclear power ug sa Pax Silica initiative, nga matod nila kinahanglan una og halapad nga diskusyon sa publiko. (BANAT NEWS)