Pepito nisugyot sa DOTr pagpatukod og monorail system

CEBU, Philippines — Nagpadala og suwat si Konsehal Winston Pepito ngadto kang Transportation Secretary Giovanni Lopez aron hangyuon ang Department of Transportation (DOTr) ug National Economic and Development Authority (NEDA) nga tun-an ang posibilidad sa pagtukod og monorail system nga magkonektar sa Barangay Pit-os ngadto sa downtown sa Dakbayan sa Sugbo.

Sa iyang suwat nga pinetsahan niadtong Hulyo 3, 2026 gisaysay ni Pepito nga ang paspas nga pagtubo sa populasyon sa amihanan ug bukirang bahin sa siyudad ilabina sa Barangay Pit-os ug kasikbit nga mga barangay ang nagdala usab og grabe nga kahuot sa dagan sa trapiko.

Si Pepito kinsa tsirman sa Committee on Transportation sa konseho sa siyudad nakamatikod nga ang kasamtangang kahimtang sa mga dalan sa amihanang distrito maoy hinungdan nga taas ang oras sa biyahe sa mga residente ug nikunhod ang oras sa trabaho sa mga tawo ug lisod usab ang paglihok sa mga tawo ug mga produkto tungod sa trapik.

Gipasabot ni Pepito nga ang monorail mahimong usa ka malungtarong solusyon sa transportasyon tungod kay usa kini ka “elevated rail transit system”.

Si Pepito nagkanayon nga makapamenos kini sa panginahanglan sa road widening, makapadali sa koneksiyon tali sa upland ug urban areas ug makasuporta sa mas malungtarong sestema sa pampublikong transportasyon.

Ug tungod niini gihangyo niya ang DOTr nga iapil ang maong corridor sa mga transport planning initiatives ug magpahigayon og preliminary feasibility study aron masusi ang teknikal, ekonomikanhon, pinansiyal ug pangkalikupan nga aspeto sa proyekto.

Gihangyo usab ni Pepito ang NEDA nga maghatag og policy guidance ug tan-awon ang posibilidad nga maapil ang proyekto sa umaabot nga national infrastructure planning ug investment programs kong uyonan ang maong sugyot.

Gipasalig sa konsehal nga andam ang kagamhanan nga motabang pinaagi sa paghatag og lokal nga datos, pag-apil sa teknikal nga mga diskusyon ug stakeholder consultations nga gikinahanglan alang sa pagtimbang-timbang sa maong sugyot. Giangkon ni Pepito nga pinaagi sa usa ka pamahayag ang nakapaaghat niya nga mosugyot og monorail system tungod sa kabalaka sa kadugayon sa mga diskusyon sa dagkong proyekto sa transportasyon sama sa Cebu Bus Rapid Transit.

Dugang ni Pepito nga nahuman na ang CCLEX ug ang SM Seaside City Arena nga bag-ohay lang gitukod nga mga proyekto apan ang CBRT padayon gihapon nga gilalisan sa konseho. — /BDB (BANAT NEWS)