Eala nanamilit na sa Wimbledon

CEBU, Philippines — Natapos na ang maanindot nga salida ni Alex Eala sa Wimbledon human ang Pinay tennis star nahagba sa kamot ni Italian 13th seed Jasmine Paolini, 4-6, 6-4, 3-6, sa last 16 niadtong Lunes sa gabii, Hulyo 6, didto sa The All England Lawn Tennis and Croquet Club sa London.

Ang 21-anyos nga si Eala nakasinati og usa ka makasaysayanong torneyo diin gibihag niya si defending champion Iga Swiatek sa Poland aron mamahimong labing unang player gikan sa Pilipinas nga nakaabot sa ikaupat nga hugna sa usa ka major Grand Slam sa Open era.

Apan wala mainat ni Eala ang impresibo niyang kampanya ngadto sa quarterfinals kay mibabay na siya human gipakaging ni Paolini.

Human natumba sa unang set, si Eala nakabawos aron pagpuwersa og deciding set ugaling lang kay nahutdan siya og bala batok sa mas determinado nga si Paolini.

Si Eala igo lamang nakatabla sa decider, 3-3, gumikan kay gipakyaw og daog ni Paolini ang sunod nga tulo ka duwa aron pag-abante sa sunod nga hugna diin iyang makasangka si Ukrainian 12th seed Marta Kostyuk.

Samtang si Eala, bisan og napakyas, makahangad gihapon sa iyang ulo tungod sa tumang garbo ug dungog nga iyang gihatag sa tibuok nasudnong Pilipinhon.