Nakatulog, naligsan

CEBU, Philippines — Duha ka riders ang nakalas sa duha ka managlahing aksidente sa kadalanan sugod niadtong Biyernes hangtud kagahapon sa kadlawon adlaw nga Sabado.

Patay ang usa ka 32-anyos nga rider human mabanggaan ug naligsan sa usa ka wing van ang iyang gisakyang motorsiklo sa National Highway sa Barangay Poblacion Ward 1, Minglanilla niadtong Sabado, Hunyo 27, 2026  alas 5:40 sa buntag.

Ang namatay mao si Vince Henry Dolino Saso, residente sa Barangay Tabtoy, Tuyan, Naga City.

Naangol usab ang iyang 37-anyos niya nga asawa nga angkas niya sa motorsiklo ug gidala sa Minglanilla District Hospital. Ang wing van gimaneho ni Jason Fernandez, 43, residente sa Barangay Pangdan, Naga City.

Sa inisyal nga imbestigasyon sa Minglanilla Municipal Police Station, nasayran nga nagpadulong sa north ang wing van agi sa inner lane samtang nagpadulong sa habagatan ang motorsiklo.

Sumala sa asawa sa biktima, giingong nakatulog ang iyang bana samtang nagmaneho,hinungdan nga misulod ang ilang motorsiklo sa pikas nga lane. Matud sa kapolisan, misulay og likay ang drayber sa wing van pinaagi sa pagliko sa tuo aron likayan ang motor apan ulahi na ug nabanggaan gyud kini ug naligsan.

Tungod sa grabeng impact, namatay dayon ang bana samtang ang iyang asawa nakaangkon og mga samad. Anaa na sa kustodiya sa kapolisan ang drayber sa wing van ug posibleng atubangon ang kasong Reckless Imprudence Resulting in Homicide, Physical Injuries ug Damage to Property. Padayon pa ang imbestigasyon sa maong insidente.

Sa laing bahin, aksidente gihapon sa motor, patay usab ang usa ka rider human kini nabangga sa luyo sa usa ka pickup truck sa southbound lane sa Tabunok Flyover sa Talisay City alas 10:40 sa buntag niadtong Biyernes, Hunyo 26.

Nakaangkon og grabeng samad ang rider ug gidala sa Cebu South Medical Center apan gideklarar siyang dead on arrival. Wala pa gibutyag sa mga otoridad ang pangalan niini atol ning pagsulat sa balita.

Matud ni City of Talisay Traffic Operations and Development Authority (CTTODA) head Joy Tumulak, base sa mga saksi, nagsubay ang motorsiklo sa outer lane sa N. Bacalso Avenue sa wala pa kini kalit nga misulod paingon sa flyover.

Pag-abot sa flyover, kusog na ang dagan niini ug diretsong mibangga sa luyo sa gisundang pickup truck. Tungod sa kusog sa impact, nasangit una ang rider sa luyo sa sakyanan sa wala pa siya nalabay ngadto sa gutter sa flyover.

Padayon usab nga gisusi sa mga otoridad kung  nakainom ba kini o dunay aberya sa iyang motor. Pahimangno ni Tumulak sa mga motorista nga dili mosikit sa gisundang mga sakyanan aron malikayan ang rear-end collisions, ilabina sa mga flyover ug highway. (BANAT NEWS)