Nabuwasot sa mga palusot

Sa iyang pag-angkon nga ang iyang paghulga pagpapatay ni Presidente Ferdinand Marcos Jr., First Lady Liza Araneta Marcos ug kanhi House speaker Martin Romualdez kabahin sa iyang “freedom of expression”, si Bise Presidente Sara Duterte nagpadayon sa iyang de-kahon nga salida sa paglikay og responsibilidad.

Kining maong lihoka mao ra gihapon ang iyang gigamit 15 ka tuig na ang nilabay dihang iyang gikulata si court sheriff Abe Andres. Ambot giunsa pagtudlo sa iyang mga ginikanan ug nganong nagtuo nga ang iyang emosyon labaw pa sa balaod ug sa kaligdong sa iyang puwesto pagka Davao City mayor niadtong 2011 ug pagka bise presidente sa 2026.

-o0o-

Kining mga maniobra sa paglikay maoy kinakusgan nga haligi sa iyang depensa sa impeachment trial nga bisan giunsa niya dili na kapugngan nga magsugod karong Hulyo 6. Imbes direktang tubagon ang seryusong mga pasangil --sama sa katingad-an nga paggasto sa ?125 milyones nga confidential funds sulod lang sa 18 ka oras niadtong Disyembre 2022 ug ang ?6.77 bilyones sa iyang bank accounts nga wala igkita sa iyang statements of assets, liabilities and networth (SALNs)-- si VP Sara nagpasalipod sa walay kinutoban nga technicalities.

Gikan sa "Plan A" nga pagpanghudlat og bloodbath hangtod sa "Plan I" nga pagpalaban sa Korte Suprema aron mabadlong ang House proceedings, gusto niyang babagan ang paggawas sa kamatuoran.

-o0o-

Iyang gi-isnab ang walo ka public hearings sa House Justice Committee, sa pagtoo nga ang pagpakahilom makaluwas niya. Ang depensa nga igo lang nibawos kay mas una siyang gihulga maong patyon na lang sab ang iyang mga kaatbang makapa-alarma nga pag-abuso sa gahom. Susama kini sa iyang paglikay sa nangaging disbarment cases ug uban pang mga atraso sa Davao nga wala masiloti.

Iyang 16 ka mga abogado peligrong mohimo sa tanang paukyab sa pagtago sa iyang SALNs, bank accounts, ug income tax returns.

-o0o-

Ang impeachment dili lang politikanhong proseso. Gitakda kini sa Konstitusyon aron pagpaningil sa kinatas-ang mga opisyal.

Kon magpaugat si VP Sara sa iyang mga palusot imbes mopasabot nganong gihatagan sa kuwarta sa katawhan si Mary Grace Piattos, igo lang gipamatud-an nga dili siya angay nga magpabilin sa ikaduhang labing taas nga puwesto sa gobyerno.