Status quo status sa kulungan nina Enrile, Gigi Reyes

MANILA, Philippines - Mananatili muna sa kani-kanilang kulungan si Senador Juan Ponce Enrile at dati niyang chief of staff na si Jessica "Gigi" Reyes habang dinirinig pa ng korte ang mga petisyon, ayon sa isang abogado.

Sinabi ni Sandiganbayan 3rd division court clerk Atty. Dennis Pulma ngayong Miyerkules na hindi pa maaaring ilipat ng piitan ang dalawa habang inaantay ang petisyon ni Enrile na makapag-hospital arrest, habang sa Camp Crame nais magpadala ni Reyes.

Sa kasalukuyan ay nasa Philippine National Police General Hospital si Enrile, habang nasa Sandiganbayan detention facility si Reyes.

"Status quo muna. Kung saan sila naka detained dun muna sila," wika ni Pulma.

Dagdag niya na hanggang ngayon ay wala pa rin namang inilalabas na commitment order ang anti-graft court.

Kahapon ay sinabi ni Presiding Justice Amparo Cabotaje-Tang na maglalabas lamang ng desisyon ang korte kapag nakapagbigay na ng tugon ang prosecution panel sa mga mosyon nina Enrile at Reyes.

Nauna nang iniutos ng korte na dalhin sa Bureau of Jail Management and Penology female dormitory sa Camp Karingal si Reyes matapos sumuko nitong Biyernes.

Kapwa kinasuhan ng plunder at graft sina Enrile at Reyes dahil sa umano'y paglahok sa pork barrel scam.