Truck ban ipatuman sugod ugma sa Talisay
CEBU, Philippines - Ipatuman na sugod ugmang adlawa ang truck ban ordinance sa Dakbayan sa Talisay nga wala gyud maimplimentar upat ka tuig sukad nga naaprubahan kini sa konseho.
Tumong niini aron mamenusan ang kahuot sa trapiko sa kadalanan niini matud pa ni Hiram Benatiro, pangu sa City of Talisay-Traffic Operation Development Authority (CT-TODA).
Nasayran nga niadtong tuig 2012 napasar sa konseho ang ordinansa nga nagdili sa mga six wheeler trucks pataas nga makadagan sa karsada gikan sa alas- 4 sa kaadlawon hangtud alas 9 sa buntag ug alas 4 sa hapon hangtud sa alas 9 sa gabii.
Si Benatiro nibutyag nga nakadawat na sila og pagtugot sa Department of Public Works and Highways (DPWH) aron sa pagpatuman sa maong lagda hinungdan nga ila nang ibutang ang mga pahimangno nga sila musikop sa mga truck nga mopadagan sa oras nga truck ban.
Asoy pa niya nga dili gyud sila magpanuko sa pagdakop sa mga truck nga mosupak sa ordinansa ug ila gyud kining i-impound ang sakyanan nga madakpan.
Ila na sab nga giandam ang ilang towing vehicles aron maoy moguroy sa ilang mga madakpan. Iyang gipang-lantawan nga makatabang gyud kini sa pagpalugak sa trapiko sa Talisay. (BANAT NEWS)
- Latest