Tilhaong, Tayud mipuwersa og rubbermatch
CEBU, Philippines - Ang Tilhaong ug Tayud mipiog sa tagsa-tagsa nila ka mga kontra aron pag-angkon og laing kinabuhi sa 6th Mayor Teresa P. Alegado Fiesta Basketball League didto sa Consolacion, Cebu.
Si Daryl Dano miayag og 32 puntos sa dihang gipakuratan sa Tilhaong ang twice-to-beat Tolotolo, 84-69, sa kampiyonato sa SK juniors category B. Ang Tolotolo nakaangkon og twice-to-beat nga insentibo human giharos og daog ang ilang mga duwa sa eliminasyon.
Sila si Junard Apao ug Harvey Cabahug nagkumboya og 37 puntos alang sa Tilhaong, nga wala na molingi pa human mibulhot ngadto sa sayong 25-15 nga labaw.
Sa SK juniors category A semifinals, ang Tayud nakapugos sab og tinagakay nga duwa human gipukan ang twice-to-beat Tugbongan, 53-48. Si Gerald Fernandez maoy nangu sa Tayud uban ang iyang 16 puntos ug gisundan kini ni Michael Alinsug nga mitali og 12 puntos.
Human magtabla sa halftime, 20-20, ang Tayud milusad og mainit nga rally sa ikatulong kuwarter aron pagkontrolar sa duwa. EBV (BANAT NEWS)
- Latest
