Biktima sa gugmang giatay

Nabantang ang talagsaong kasuod ni Presidente Rodrigo Duterte sa mga sakop sa media sa Davao City sa iyang pakighinabi nila sa niaging adlaw nga gisibya sa YouTube Channel sa Radio-TV Malacañang (RTVM). Labing duol sa iyang kasingkasing ang beteranong mga peryodista ug mga magsisibya nga nakaabot sa dakong bahin sa kapin sa duha ka dekada niyang pagduma sa City Hall.

Mga sinaligan ni Duterte nitataw nga kalikayan ang mga kontrobersiya sa mga pamahayag ni Duterte kon ang mga sakop sa media sa Malakanyang makat-on gikan sa taga Davao unsaon paghubad ang mga tubag sa presidente sa ilang mga pangutana, labi nang abunda niyang mga pasiaw ug pamalikas.

* * *

Maong naminaw ko sa dul-an sa oras nga kalihokan nga gitawag sa Malakanyang nga "ambush interview" uban ang panghinaot nga may makat-onan. Mas giganahang nag-Binisaya si Duterte bisan nahibawo nga nakita ug nabati sab siya sa gipanag-iya sa gobyerno nga PTV 4 sa kaulohan.

Pamilyar kaayo sila sa usag-usa. Daghan sila og gisaw-an nga mga ngan, istorya ug komedya nga way mga detalye apan suhito ang kasagarang nanambong kay nanghugyaw man sila og pangatawa. May mga nangahas gani og bugalbugal ni Duterte nga wa makadawat og bisan unsang badlong ni kasaba. Apan demalas ang di taga Davao ug wa makakuyog ni Duterte sa nangaging katuigan kay wa gyod silay kasayuran unsay ilang gipasabot.

* * *

May nisuway pagsal-ot og pangutana samtang nagpadayon pang tubag ni Duterte. Nga sa mubo nga kasinatian sa mga sakop sa media sa Manila di tugotan sa presidente, maong kasagaran nila maghuwat kanus-a mahuman ang mga tubag nga kasagaran mas taas kay sa naandan ug motuki na sa ubang mga isyu o mobalik sa karaang mga kontrobersiya.

Tuod man, gipahilom ni Duterte ang nisapaw sa iyang tubag. Apan pagkataudtaod niingon nga, "Uy, ikaw man diay na, Day. Higala man diay tika. Kaingon nakog kontra ta." Ug gitugotan ang babayeng sakop sa media pagputol niya ug pagluwat og laing pangutana.

* * *

Dihang gitawag ni Duterte si Senador Leila de Lima nga "Delilah," giingnan siya sa babayeng sakop sa media nga, "duna nay de uy." Maong niingon ang presidente nga, "sige, Laylay na lang," ug nangatawa silang tanan.

Usa sa bag-ong reporter nga nasagol, kadtong taga PTV 4 nga gidapit ni Duterte nga mangaon sila og durian, nangutana parte sa lalaki nga gipasanginlan sa presidente nga bag-ong hinigugma ni de Lima. "Uyab lagi na sila," niinsistir si Duterte, "nga mao say mahitabo nato kon mosugot ka." Gisubli sa reporter ang iyang tubag sa una nilang panagtagbo, "grabe, Sir." Nga gisapawan sa presidente nga "walang grabe sa pag-ibig." Laing babayeng sakop sa media nituaw, "si Digong biktima na sab sa gugmang giatay."