Anugon kaayo si Comendador

Gianugnan gyud ko nga gihulipan sa iyang katungdanan si Chief Superintendent Patrocinio Comendador isip regional director sa kapolisan dinhi sa Central Visayas.

Bisan og wala ko magsunod-sunod kanunay ni Comendador, apan sigurado ko nga buotan siya nga pagka polis ug wala gayud siya malambigit og pagpangilkil, ilabi na gikan sa mga tawo nga nalambigit sa ilegal.

Husto si Cebu City Mayor Tomas Osmeña sa iyang pangagpas nga ang gihimo ni PNP Chief Ronald Dela Rosa mahimong makapaluya sa kapolisan.

Nindot unta kadto kon gipili lang ni Dela Rosa ang mga opisyal sa kapolisan nga iyang hulipan sa katungdanan. Kadtong mga buotang opisyal, sama ni Comendador, angay'ng ipabilin lang sa puwesto.

Gikuyawan ko nga ang akong amigo nga si Senior Superintendent Clifford Gairanod, provincial police director sa Sugbo, basin og ilisan na usab sa katungdanan.

Walay lalis nga maayo kaayong pagkadumala ni Gairanod ang kapolisan sa probinsya. Mas nindot gyud nga ipabilin ra sa puwesto si Gairanod.

Bisan ang mga tawo nga nalambigit sa pagpadagan og mga ilegal, nakadayeg kaayo kang Comendador. Dihang reporter pa ko sa kapolisan kaniadto, nakahinabi ko og mga tawo nga nagpadagan og ilegal nga sugal.

Usa ka higayon kuno, ilang gitanyagan si Comendador kaniadto nga hatagan og kuwarta kada semana aron bugti sa dili kampanyahan ang ilang operasyon sa ilegal nga sugal, apan gibalibaran gyud sila.

Tungod niini, naani ni Comendador ang pagdayeg, ilabi na sa iyang mga sakop. Apan unsaon man, mando man sa PNP Chief nga hulipan si Comendador ug gani miasumer na ang gipuli kaniya.

Lauman na lang nato nga hatagan gihapon si Comendador og maayong puwesto didto sa Camp Crame nga makakuha hinuon siya og ranggo nga katumbas sa duha ka bitoon.

* * *

Angayang sundugon sa mga traffic enforcer kadtong gihimo sa usa ka traffic enforcer didto sa Mandaue nga bisan og kusog kaayong uwan ug naglunop na sa dapit diin didto siya madestino, wala gihapon siya mibiya sa puwesto.

Nakuhaan ang traffic enforcer og hulagway sa usa ka motorista nga nakadayeg kaayo kaniya. Nakadungog ko nga gipasidunggan ni Mayor Luigi Quisumbing ang maong traffic enforcer.

Pastilan, ang mga traffic enforcer dinhi sa dakbayan sa Sugbo, nangawala dihang mibunok ang kusog nga uwan kaniadtong Biyernes ug gipasagdan lang nga nagkaghuliyang ang traffic.

Ang mga traffic enforcer gipanghatagan og rain coat sa City Hall aron magamit nila kon mag-uwan, apan ang nakadaot kay wala kini dad-a nila mao nga mitalaw sila sa uwan.

Akong napanid-an nga kadtong grabeng problema sa trapiko sa Osmeña Boulevard gikan sa downtown area paingon na sa Fuente Osmeña naggumikan kadto kay wala na'y traffic enforcer sa Fuente.

Kaniadto dihang deputized agent pa ako sa Land Transportation Office (LTO), gidumala nako ang grabeng problema sa trapiko sa Fuente Osmeña atol nga nag-uwan kay usa ra ka traffic enforcer ang didto.

Kon biyaan gud sa traffic enforcer ang Fuente Osmeña rotunda, mag-ilogay ang mga sakyanan pagsulod sa rotunda, ug resulta, makamugna kini og pagkabara sa dagan sa mga sakyanan.