Nilikoy ba si Archival?

Niadtong katuigan nga konsehal pa si Cebu City Mayor Nestor Archival usa siya sa mga nangayo sa mga dokumento sa pagtukod sa Cebu City Medical Center (CCMC). Kay uban ni kanhi konsehal Mary Ann delos Santos, si Archival na-alarma sa grabeng kalangay sa proyekto.

Pero kay sakop man sila sa minority bloc, ug ang mayoriya sa mga konsehal alyado man sa nangaging mga mayor, wala sila paminawa. Nireklamo silang Archival ug delos Santos nga wala hatagi sa Department of Engineering and Public Works (DEPW) sa mga dokumento nga ilang gipangayo.

Kada barug nila sa konseho sa pagpangayo sa mga dokumento, nipasalig silang kanhi mayor Mike Rama ug kanhi mayor Raymond Garcia nga ihatag sa mga konsehal ang tanang mga dokumento nga konektado sa konstruksiyon sa CCMC.

Pero kutob ra sila sa istorya. Kon tinuod nga nisugo silang Rama ug Garcia sa pagpagawas sa mga dokumento, ang taga DEPW wala motuman nila. Ang laing posibilidad mao nga wala silay interes sa pagpahibawo nilang Archival ug delos Santos unsay tinuod nga nahitabo sa nabulilyaso nga proyekto nga nakapa-uwaw sa ilang administrasyon.

Makiangayon ang demanda nilang Archival ug delos Santos. Naglaom sila nga ang mga dokumento makapasabot nganong wala pa mahuman ang CCMC, pila na ka milyon ka pesos ang gasto, pila pa ang dugang pundo nga gikinahanglan, pila na ko porsiyento sa proyekto ang nahuman, ug pila pa ka buwan o tuig ang maabtan.

Maong dakong pilde sa mga Sugbuanon nga gitago gikan nilang Archival ug delos Santos ang gipangayo nga kasayuran. Wala mapasabot unsay gigamitan sa ilang buhis.

Mayor na si Archival karon. Siya na ang labaw ug busa dili na mabalibaran sa mga inhinyero sa City Hall nga nagdumala sa proyekto ang mga pakisayod sa mga transaksiyon a CCMC.

Maong lisod sabton ang report sa Commission on Audit (COA) nga hangtod karong tuiga, 12 ka tuig human sugdi ang konstruksiyon ug ?1.13 bilyones nay nagasto, wala kasumiter ang DEPW sa mga dokumento sa proyekto. Napawong na ba diayng interes ni Archival sa pagsusi kinsay mga responsable, nga posibleng mao say labing nabuhong, sa nangalisbong eskandalo nga gibilin sa nangaging mga administrasyon?