Seguridad sa mga eskuylahan sa Mandaue City palig-unon

CEBU, Philippines — Ang Mandaue City Government mopalig-on sa seguridad sa mga eskwelahan  aron masiguro ang kaluwasan sa mga estudyante ug mga kawani niini sumala pa ni Mandaue City Mayor Thadeo Jovito “Jonkie” Ouano human sa emergency special meeting sa Local School Board niadtong Miyerkules, Hunyo 24.

Ang miting gihimo human sa nahitabong pagpamusil sa usa ka tunghaan sa Tacloban City niadtong Hunyo 22 nga niresulta sa pagkamatay sa tulo ka estudyante ug pagkaangol sa 20 ka tinun-an.

Gisusi sad sa Local School Board ang pagpalambo sa live monitoring systems sa mga eskwelahan, dugang og CCTV cameras, walkthrough o handheld metal detectors, mga polis ug tanod nga mobantay sa 48 ka mga eskwelahan sa siyudad.

Maghimo og symposium sa mga ginikanan mahitungod sa positive parenting ug epektibong komunikasyon uban sa ilang mga anak. Tudloan sab ang mga bata og self-defense orientation ug safety awareness programs dungan sa pagpalig-on sa mental health support programs ug ang implimentasyon sa anti-bullying policy pinaagi sa koordinasyon sa Mandaue City Substance Abuse and Mental Health Services Office (SAMHSO) ug City Social Welfare Services Office (CSWSO). IBM BANAT NEWS