Menor nga nagmotor patay sa bangga

CEBU, Philippines Usa ka 15-anyos ang patay samtang naangol ang amiga niini human sila nadumbolan sa usa ka dumptruck samtang sila nagsakay og motor diha sa Barangay Panoypoy,  Lungsod sa Consolacion niadtong Miyerkules sa hapon.–   Ang nakalas mao si Joan Miñoza, samtang naangol ang iyang amiga nga si Nicole Montalla, 15, ug anaa karon sa tambalanan.

Matud pa ni traffic investigator PO1 Roel Aquino, si Montalla ang nagmaneho og usa ka Yamaha Mio nga motorsiklo ug angkas niini si Miñoza. Giingong nisuway og overtake sa usa ka Isuzu dumptruck nga gimaneho ni Alfonso Roa Bajalan, 42, apan nawad-an kini og kontrol tungod sa kagamay ug dulhogon ang dalan ug nangaligsan hinuon.

Ang drayber sa dumptruck boluntaryong nitahan sa Consolacion Police Station ug naghuwat sa tukmang kaso nga ipasaka batok kaniya.

Sa pikas bahin, nakamugna og grabeng traffic sa Cebu South Coastal Road Properties (SRP) sa habig sa Barangay San Roque, dakbayan sa Talisay kagahapon sa buntag ang pagkalimbuwad sa usa ka trak nga nagkarga og mga bugas tungod sa pagbuto sa usa ka ligid sa likod niini.

Ang nagmaneho sa trak mao si Rogino Logumbay, 37 anyos nga lumad nga taga Bato, Leyte. Matud ni Gino Mabuyo, inspector sa City of Talisay-Traffic Operation Development Authority (CT-TODA) gikan sa Siyudad sa Sugbo ang maong truck paingon sa habagatan aron i-deliver ang 100 ka sakong bugas niini.

Apan pag-abot sa maong lugar nibuto ang luyo nga ligid hinungdan nga nalimbuwad kini. Gidala sa tambalanan ang kauban ni Logumbay nga usa ka babaye tungod sa ginagmay nga pangos.

Ang maong aksidente nimugna gyud og kahuot sa dagan sa trapiko sa lugar kun diin ang mga sakyanan nga natanggong nga paingon sa habagatan niabot na dapit sa dakong mall diha sa SRP.(Kathleen Kaye G. Gonzaga, CNU Intern/IBM)(BANAT NEWS)