Adlawan, supatan mihari sa 20th Ornopia Motocross Cup

CEBU, Philippines - Ang tadhang Sugboanong rider nga si Jonjon Adlawan ug ang dekalibre sab nga si Denmark Supatan maoy nanghawod sa 20th Ornopia Motocross Cup niadtong Domingo didto sa Barangay Calambua, San Remigio amihanang bahin sa Sugbo.

Si Adlawan misidlak sa duha ka dagkong dibisyon sa maong lumba nga giorganisar sa MS Motosuit ni Cebuano businessman/sportsman Lou Ornopia aron paglamas sa tinuig nga selebrasyon sa pista sa Calambua agi’g pangilin sa mahal nilang patron nga si San Vicente Ferrer.

Mipakita sa porma nga naghimo kaniyang “Rider of the Year” sa MS Motosuit Motocross Series pipila ka tuig ang milabay, si Adlawan mipilde nilang Supatan ug Jelo Leonardo aron pagdominar sa expert category. Iya sab nga gibuntog silang Venil Abellar ug Paulo Inoc aron paglangkat sa pro open title.

Duna hinuo’y rason nga magmaya si Supatan gumikan kay siya maoy naghari sa intermediate class batok nilang BJ Pepito ug Erljun Codiñera. Angay sab nga magmaya si Codiñera gumikan kay siya maoy mikubit sa korona sa novice production pinaagi sa pagpilde nilang Clinton Gualiza ug Joel Labasano.

Ang wa’y pagbahar nga si Pepo Rubi misalida sab uban ang duha ka kampiyonato sa veterans class ug Executive A. Milampos sab sila si Ayen Ledesma (executive B), ug Ani Enriquez (executive C).

Lain pang mga mananaog mao sila si Cyrill Tariman (local enduro), Dongkey Sanchez (open enduro), John Vergel Hisoler (beginners), Jaime Ponce (elite), Terrence Codiñera (mini class 65), Sharlet 

Gallarde (mini class 85cc), Pankoy Pepito (buggay), RK Cuesta (ladies 12-under), Jomar Villaban (underbone) ug Jeanette Olanda (peewee 50cc).

Ang maong kalihukan gipahigayon agi’g pagtambayayong sa F&FO Motorparts, RMO Motorparts, N Style, JCO Motorparts, Prospeed, Motomaze, Aike MC Motorparts, MS Apartelle, SNR MBJ Motomaze, NF Enterprises, Olilab Oil, Cebu Newstar ug Petron Oil.

Nahimo sab kining posible gumikan sa suporta nilang Kongresista Benhur Salimbangon, Board Member Sun Shimura, Vice Mayor Al Pestolante, Engr. Susan Ornopia Aroa, Diosdado Navarez, Lenley Concillado, Rowena Jubay ug Ani Navarez.