Kapolisan pasuportahan ni Konsehal Garganera

CEBU, Philippines - Nagtinguha si Konsehal Joel Garganera nga moduso og resolusyon tumong sa pagpangayo og status labot sa pagpamalit og combat gears nga gipangayo sa Special Weapons and Tactics (SWAT) sa Cebu City Police Office (CCPO).

Kini human niya nakita nga kinahanglan hatagan ang kapolisan sa ilang panginahanglanon.

Base sa resolusyon sa konsehal nga ang P15 milyones gamiton alang sa pagpamalit og 60 units sa M16/M4 rifle, 60 units sa ballistic vest, ug 60 units sa ballistic helmet diin kini giaprubahan sa konseho niadtong Disyembre 13, 2016.

Si Mayor Tomas Osmeña pabor niini apan sa pagkakaron dili pa kini ang iyang prayoridad ug mas gihatagan una niya og pagtagad ang pagsulbad sa mga problema sama sa basura ug trapik.

Samtang duna pay laing resolusyon nga iduso si Garganera nga mag-awhag sa kagamhanan sa siyudad sa paghatag og service patrol vehicle kang Cebu City Police Office Director, Senior Supt. Joel Doria ug mga deputies niini. Si Osmeña niingon nga si Doria mismo ang dili gusto dungan sa paghulagway sa maong opisyal nga simple lang nga pagkatawo.

Laing resolusyon nga iduso ni Garganera ang pag-inquire sa status sa request ni Doria og mga air-conditioning units ug office furniture.

Ang ika-upat nga resolusyon mao ang pag-awhag sa kagamhanan sa siyudad sa pag-revive sa “Adopt-A Station Project” sa Cebu Chamber of Commerce and Industry uban sa stakeholders ug pagtagana og pundo pag-renovate ug pag-maintain sa police stations sa siyudad. (Decemay P. Padilla/GMR)

Mga kahoy gamitonon sa balay gisakmit

Natanggong sa prisohan ang 35-anyos nga lalaki human nasakmiti og mga pinutol nga kahoy nga gikarga sa multi-cab nga walay permit sa Binlod, Lungsod sa Argao alas 10 sa gabii niadtong Huwebes.

Ang nasikop mao si Narceso Nemolini, residente sa Barangay Hampang sa maong lungsod.

Matud ni Police Officer 1 Jayson Lobendina, desk officer sa Argao Police Station, nga nag-roving ang ilang mga tawo dihang nakit-an na lang sa ilang team ang gisakyan ni Nemolini nga puno sa kahoy nga Bulbulan apan walay permit nga gipakita.

Gitanggong sab sa kapolisan ang multicab ni Nemolini.

Giangkon ni Nemolini ang maong mga kahoy nga gamiton unta sa tukuron nga balay sa iyang inahan.

Giandam na sa kapolisan ang pagpasaka og tukmang kaso batok sa dinakpan. (/GMR)(BANAT NEWS)