Panamastamas sa Fuente

Sulod na sa pipila ka adlaw, gatusan ka lumad ug uban pa’ng mga militante gikan sa Mindanao ang ania sa dakbayan sa Sugbo aron pagpaabot sa ilang kawsa batok sa ilang giingon nga kahiwian sa administrasyon ni Presidente Duterte.

Ug samtang ania sila dinhi sa Sugbo, anaa sila karon sa Fuente Osmeña circle nagyampungad sulod na sa pipila ka adlaw sa dili pa sila molahos ngadto sa kaulohan. Didto na usab nila ipadayon ang ilang yangungo batok sa kagamhanan.

Nahisama intawon sa refugee center ang Fuente Osmeña. Daghan karon ang nangyam-id sa maong eksena. Kini gumikan lagi sa dili maayo nga talan-awon. Tiaw mo ba nga hilabihan ka daghan sa mga hinayhay ang nagbitay diha sa maong parke.

Ngil-ad kaayo kini nga talan-awon, ilabi na alang niadtong mga langyaw’ng turista nga ania karon sa dakbayan. Niining ilang pag-okupar karon sa Fuente Osmeña, sama ra nga ilang gipanamastamasan ang kasagrado sa maong parke.

Dili ako lumad nga taga Sugbo, apan sangko sa langit ang akong pagkadismaya niini’ng nahitabo sa Fuente Osmeña karon. Matag agi nako sa uptown area sa akong hiking matag buntag, igo na lang ako sa paglingulingo sa talan-awon sa mga nagbitay nga mga hinayhay.

Ambot ngano nga gitugtan sila sa lokal nga kagamhanan sa dakbayan. Adunay daghang lugar sa siyudad nga mahimo nilang kapundohan apan wala ko kasabot ngano nga milugak man ang City Hall ug mitugot kanila pag-okupar sa Fuente Osmeña.

Adunay taho nga mitanyag si Konsehal Dave Tumulak sa mga lumad nga adto una sila mopahiluna sa Cebu City Sports Institute. Apan midumili kuno sila. Sa akong tan-aw, gusto man gud sila nga adto sa Fuente Osmeña kay aron lagi mahimo nga sentro sa atraksiyon.

Karon miani na hinuon og mga pagbatikos kining pag-okupar nila sa maong parke. Estrikto kaayo ang City Hall sa seguridad sa Fuente Osmeña nga wala gani estambay nga mabuntagan sa maong lugar. Apan daghan ang wala makasabot ngano nga miluhod ang siyudad ngadto sa mga lumad.