Salida ni Dong
Nagplano si Kenneth Dong paghimo og pelikula mahitungod sa mga suki sa iyang mga bay patigayon sa Sugbo. Nipasalig siya nga ang tuyo di ang pagbandilyo sa iyang negosyo kon dili ang pagpalambo sa turismo sa Sugbo. Gipahibawo ni Dong nga magsugod nang shooting sa pelikula karong buwana.
Ambot mahinayon bang pelikula ni Dong karong gilambigit na sa bulilyaso sa Bureau of Customs sa P6.4 bilyones nga shabu nga gipayuhot gikan sa China. Ambot nadayon ba pagpirma og kontrata uban sa iyang ganahang mga artista nga silang Bea Alonzo, Maja Salvador, ug Derek Ramsay.
***
Nakugang ang kapolisan sa pagtumaw sa ngan ni Dong. Apan giimbestigar na diay siya sa PDEA-7 sukad niadtong Oktubre tungod sa mga pasangil sa kalit nga pagburot sa iyang katigayonan ug mga transaksiyon sa drugas sud sa iyang mga bay patigayon.
Ang 33 anyos nga si Dong dunay laing duha ka ngan: Dong Yi Shan Xi ug Yi Shan Dong. Nagpaila nga bise presidente sa Asuki Group, contruction company sa Quezon City, ug tinun-an sa Manila Patriotic School, ang labing karaang Chinese school sa Manila, sa 1998 ngadto sa 2004.
***
Mas suhito ang mga senador ug mga kawani ni Dong. Nga nanghatag og minilyon ka pesos sa ilang mga kampanya, niamot sa ilang mga kawsa, namangka nila og kaon, nipabaha og raffle prizes sa ilang parties, nilibot sa ilang mga buhatan, nagpaletrato uban nila ug nakighigala nila sa Facebook.
Mahimong di kahibudngan nga natapok ni Dong ang mga senador ug ubang politiko ug inilang mga artista ug mag-aawit alang sa luho niyang kasal. Apan napasundayag ang iyang kahawod kay ang kasal nahimo usa ka adlaw human sa makalilisang nga bagyong Yolanda niadtong 2013.
***
Gikataho nga usa siya sa nanag-iya sa commercial strip sa Mandaue nga naglakip sa mga kan-anan ug imnanan. Nasuyop sa iyang super clubs ang lokal ug nasudnong mga politiko nga nabuhong sa libreng inom ug kalingawan.
Gitangtang na sa social media accounts ni Dong ang nagbaha niyang mga hulagway uban sa mga opisyal sa gobyerno ug mga artista. Apan nipuli sab pagkatap ang iyang hulagway uban sa usa sa mga anak ni Presidente Duterte.
- Latest
