EDITORYAL - Dakop nga walay pili

Angay ba nga dunay mga kompaniya nga dili iapil sa kampanya pagpatuman sa Nationwide Smoking Ban nga gimando ni Presidente Rodrigo Duterte? Giluwatan sa presidente ang usa ka kamandoan nga estrikto na g’yud nga idili ang pagpanabako sa mga publikong lugar.

Nahibaw-an nga adunay balay patigayon nga namaligya og coffee nga gustong dili sila apilon sa pagpatuman kay maapektohan niini ang ilang negosyo. Matud pa nga dunay ilang mga kustomer nga samtang maghigop sa kape, magkalingaw usab pagbuhot og sigarilyo.

Angay tingali nga hinuktokan pag-ayo sa tagdumala niining maong coffee shop nga dili tanang kustomer nila ang mohanggap og aso gikan sa sigarilyo. Kon duna sila’y smoking area alang niadtong mga manigarilyo nilang kustomer, tingali wala’y problema.

Subo lang nga dinhi sa dakbayan sa Sugbo, hinay ang kampanya sa atong kapolisan ug sa mga tinugyanan sa siyudad aron pangdakpon ang mga malapason sa kamandoan sa presidente.

Gani, bisan diha sa mga jeepney nga pasaheroan makita nga ang mga driver mismo maoy mag-unauna sa pagpanigarilyo. Tingali angay na nga higpitan usab ang pagpanakop niining mga tawo nga maglabang-labang diha sa karsada sa ilang pagpamaligya og sigarilyo.

Una, nakalapas sila sa balaod kay ang ilang gihimo nakahatag sila og risgo sa mga motorista, ug ikaduha mao nga sila maoy nag-agni sa mga hinabako nga driver nga mopalit sa ilang baligya aron manigarilyo.

Ang Republic Act 9211 nagdili g’yud sa mga bata nga sugoon sa pagpapalit og sigarilyo tungod kay kini maoy makatudlo kanila sa pagpanabako. Dunay mga amahan, o ubang mga tawo nga sugoon ang mga bata sa pagpalit og sigarilyo ug padagkotan kini daan.

Sa paninguha nga dili mapawong ang kayo, panagsa suyopon kini sa bata aron dili mapawong ug sa ingon niini nga sitwasyon, nagtudlo na kini sa maong bata sa pagpanabako.

Gitataw sa mga eksperto sa panglawas nga ang paghanggap usab sa aso gikan sa tawo nga nanigarilyo, makahatag kanato og sakit.