Kasikas sa NBA

Bogut dili operahan

Dili operahan ang nabali nga paa ni Australian center  Andrew Bogut, apan ang nahiaguman niining injury hingpit na gyud nga nakatuldok sa iyang season.

Si Bogut igo lamang nakaduwa sud sa 58 segundos atol sa iyang debut uban sa Cleveland  Cavaliers nga  giusban og pilde sa Miami Heat, 106-98 niadtong Martes.

Human sa makuting pakisusi, nasuta sa mga doktor nga dili na kinahanglan pang operahan si Bogut gumikan kay maalim ra ang gihambin niining balatian pinaagi sa rehabilitasyon.

Durant sugod nag rehab

Maayo ang dagan sa rehabilitasyon sa naangol nga bitoon sa Golden State Warriors nga si Kevin Durant.

Kahinumduman, nga napiang si Durant niadtong Pebrero 28 ug sa dihang gipaubos sa MRI, nasuta nga dunay sprain ang wala niyang tuhod. Gitambagan siya sa mga doktor nga mopahuway  sud sa upat hangtod sa unom ka semana.

Gusto ni Durant nga makarekober dayon aron makabalik  og duwa kay klaro man kaayo nga gikinahanglan sa Warriors ang iyang tabang. (BANAT NEWS)