Pagpili sa tunga

Si kanhi presidente Fidel Ramos ang labing uwahing nitingog pagprotesta sa kalit ug tago nga paglubong sa patay’ng lawas ni kanhi presidente Ferdinand Marcos sa Libingan ng mga Bayani (LNMB) niadtong udtong tutok sa Biyernes.

Giisip niya ang lakang nga dakong insulto sa mga sakripisyo sa kasundalohan, labi na nga ang armadong kusog ang kakonsabo sa mga Marcos sa lipatlipat nga lubong.

Igo ba ni nga makapukaw sa kahimangod sa kasundalohan ug bisan sa kapolisan nga sama sa kinabag-an sa katawhan niisip sa lubong ni Marcos nga bugalbugal sa mga bayani nga nakigbisog batok sa diktadura? O igo na nga wa pa matuman nga saad pagdoble sa ilang suholan paghipos nila?

* * *

Wa magpakahilom, apan wa say plano nga mobiya sa administrasyon ni Presidente Rodrigo Duterte ang upat ka sakop sa iyang gabinete nga nisupak sa paglubong ni Marcos sa LNMB:

Sila si Bise Presidente Leni Robredo, nga gitudlo ni Duterte nga tagduma sa Housing and Urban Development Coordinating Council (HUDCC), si Kalihim Judy Taguiwalo sa Department of Social Welfare and Development (DSWD), Kalihim Rafael Mariano sa Department of Agrarian Reform (DAR) ug Liza Maza nga mao karon ang pangulo sa National Anti-Poverty Commission (NAPC).

Mosuporta gihapon sila sa administrasyon bisan nagkasungi ang ilang baruganan, dili lang mahitungod sa lubong ni Marcos, kun dili, hasta sa extrajudicial killings ug pagtahod sa kababayen-an.

* * *

Nga mao say baruganan sa mga alyado ni Duterte nga nikondenar sa diktadurang Marcos. Napugos na karon sila sa pagpakahilom o paghinay sa ilang protesta kay nakaambit man sila sa politikanhong gahum nga gisabwag ni Duterte human sa iyang kadaogan niadtong Mayo.

Labing kahibudngan ang pagpakahilom ni Senador Alan Peter Cayetano nga maoy running mate ni Duterte sa niaging piniliay. Gisupak niya ang paglubong sa patay’ng lawas ni Marcos sa LNMB.

Apan siya sab ang labing aktibong tigpanalipod ni Duterte batok sa bisan unsang mga pagsaway. Ang pagpakahilom na ba lang ni Cayetano ang alternatibo sa pagtulon sa iyang mga pulong?

* * *

Nasuyop silang tanan sa duwa ni Duterte. Si Ramos makapatuyang sa pagpanaway kay wa na may influencia sa militar ug kapolisan. Bugtong nakapugong sa balikas ni Duterte mao nga siya ang usa sa nakapakumbinser ni Duterte pagdagan pagka- presidente.

Sila si Robredo, Taguiwalo, Mariano, Maza ug ubang sakop sa administrasyon niapil sab sa duwa. Gikumbinser ang ilang kaugalingon nga dili pa karon ang tukmang panahon sa pagbuwag sa administrasyon kay mas daghan sila og mahimo alang sa katawhan kun magpabilin sa ilang katungdanan inay nga maglihok nga wa nay gahum.

Hinaot nga tukma ang ilang pangagpas, kay ang labing bug-at nga silot giandam ra ba batok sa mga wa’y kaisog pagpili sa husto, busa niapil sab og kumpayot sa daotan.

([email protected])