Karton gibilin sa terminal, gidudahang drugas
CEBU, Philippines - Karton nga adunay sulod nga mga tambal, unang gidudahan nga ilegal nga drugas, gikostudiya sa buhatan sa Parian Police Station human kini gibiyaan sa terminal sa mga van sa Barangay Kamagayan, dakbayan sa Sugbo pasado alas 10 kagahapon sa buntag.
Ang desk officer sa Parian Police nga si PO2 Edades Bustarde niingon nga usa ka barangay tanod ang unang nakabantay sa maong karton nga gibiyaan sa terminal ug gidala kini sa maong tanod sa ilang buhatan aron masusi ang sulod.
Nasuta nga sulod sa maong karton ang kinarton nga ampoules sa tambal nga Ranitidine HCL diin kini niabot sa 799 ka mga ampoules.
Ang mga polis unang nagtuo nga nubain ang sulod sa maong karton kay susama og sudlanan sa maong drugas ang ampoules sa maong mga tambal, apan nasayran nga kini tambal diay sa sakit sa tiyan.
Matud ni Bustarde nga ila unang ikostudiya ang maong mga tambal ug magpaabot nga adunay mokuha niini nga tag-iya nga magdala sa saktong dukomento aron makuha ang maong mga tambal. (BANAT NEWS)
- Latest
