Hagit sa paugnat sa kusog

Makapaikag, gawas nga makalingaw tan-awon ang mga magduduwa nga nisalmot sa Ironman Asia Pacific Championship nga gipahigayon gahapon dinhi sa Sugbo.

Sa wala pa magsugod ang duwa, gawas sa mga atleta nga excited samtang ang uban gipangulbaan, ang mga tinun-an sa mga publikong tunghaan sa dakbayan sa Lapu-Lapu, excited usab nga makakita.

Gawas nga obligado sila sa attendance isip tig-abiba sa mga magduduwa, sila mismo ganahan usab nga motan-aw sa duwa bisan kun nagpasabot kini nga kinahanglan sila nga magpainit o kaha mauwanan.

Maayo na lang nga wala mag-usab-usab ang dagan sa panahon apan gisagubang sa mga magduduwa ug sa mga nitan-aw ang kainit. Sa rota sa bisekleta, maayo na lang nga wala mabalda ug dili sa bike route nahitabo ang disgrasya.

Usa sa mga nag-atang sa pag-agi sa mga biker nadasmagan sa motorsiklo nga giingong nagdali ug wala makabantay sa nilabang nga pedestrian.

Gilatas sa mga biker ang rota gikan sa Shangri-La Mactan Resort and Spa agi sa kadalanan Barangay Punta Engaño, Mactan, Ibo, Pusok ug pagawas ngadto sa Maximo Patalinghug, agi sa Marcelo Fernan Bridge agi sa North Reclamation Area sa dakbayan sa Mandaue, lahos sa Serging Osmeña sa dakbayan sa Sugbo ngadto na sa South Road Properties paingon sa dakbayan sa Talisay.

Samtang nagtan-aw mi sa mga magduduwa, akong kauban sa TV Patrol Central Visayas nga si Jude Torres nipadayag sa iyang interes nga mosalmot sa lumba.

Naikag ug nadasig siya sa iyang mga nakit-an nga dunay daghan sa mga nisalmot nga mga bug-at og timbang apan nakasugakod sa langoy, bisekleta ug dagan. Bisan kun kusog ang bawod ug sulog sa 1.9 km swim, nalatas sa mga swimmer ang lisud nga hagit.

Apan dili sayon ang pagsalmot sa Ironman. Gawas nga maglisod ka sa pagsulod ug sa kadali nga mag-close sa online registration, dili lalim ang pagpraktis para niini.

Magkinahanglan ka og igong panahon sa praktis sa tulo ka disiplina sa langoy, bisekleta ug dagan. Gawas sa praktis kinahanglan ang kalig-on sa lawas ug determinasyon sa pagtapos sa duwa. Medyo gastoso usab kini nga matang sa paugnat sa kusog.

Usa sa mga magduduwa sa relay team nga gikan pa sa Singapore apan mga Filipino nga akong nahinabi niingon tibuok pamilya silang nisalmot.

Iyang anak niapil sa Ironkids triathlon, samtang siya ug iyang bana sa relay team. Duna usab sila’y laing grupo sa mga Filipino gikan gihapon sa Singapore nga tibuok pamilya usab nisalmot sa triathlon.

Matud ni Andrea Siera nga bisan gastoso apan gawas nga makalingaw naghatag kanila og kalagsik sa lawas gawas nga napalig-on ang ilang relasyon isip magtiayon ug pamilya.

Sa mga interesado sa bisan unsang matang sa paugnat sa kusog o sa bisan unsang paningkamot sa pagpalambo sa kaugalingon gikinahanglan ang determinasyon sa pagsungasong sa bisan unsang hagit ug kakulian nga masugatan.