Kinsa'y duol sa luwag?

Tinuod ba nga daghang kawani sa Cebu City Hall nga miretiro na sa serbisyo apan dugay kaayo nga nahatagan sa ilang terminal leave benefits?

Nakabantay si Cebu City Councilor Alvin Arcilla nga adunay "pabor-pabor" ang pagpanghatag sa terminal leave benefits kay giuna ang iyang gihulagway nga "duol sa luwag."

Matud ni Arcilla nga adunay retirado nga kawani sa City Hall nga hangtud karon wala pa gayud mahatagi sa iyang terminal leave pay nga gikinahanglan g'yud unta niya sa pagpa-dialysis sa iyang bana.

Dunay P5 milyones nga gipagahin ang Local Finance Committee para sa terminal leave benefits sa 11 ka kawani sa City Hall nga adto ibanon sa pasiuna nga halin sa yuta sa South Road Properties (SRP).

Gikuwestyon ni Arcilla kon ngano nga 11 ra man ka tawo ang pabayran sa ilang terminal leave benefits ug ang dagko kaayo'g kobrahonon mao ang tulo ka opisyal, apil ang duha ka kandidato pagka konsehal sa Team Rama.

Base sa dukomento si Engr. Dionesio Gualiza (P1,891,817); Atty. Joey Daluz (P700,000) ug Edu Rama (P810,464). Ang laing walo ka kawani gagmay ra ang kantidad sa ilang terminal leave benefits.

Kon tinuod man nga daghang kawani sa City Hall nga dugay na kaayo'ng miretiro unya wala pa gihapon mahatagi sa ilang terminal leave benefits kay giuna ang mga suod sa mayor, aw, dili na kana maayo.

Ang laing gibatbat ni Arcilla mao ang pagpabayad sa Knockbox Pizzeria sa kantidad nga P99,200 sa pagkaon nga gi-supply niini atol sa "Rakrakan sa Sugbo" sa miaging tuig.

Ang maong kalihukan usa kini ka indigay sa mga banda sa kabatan-onan diha sa mga barangay. Gamay ra ang kantidad apan ang gikuwestyon ni Arcilla kay ang supplier inahan man diay sa uyab ni Konsehal Gerry Carillo.

Nangatarungan si Carillo nga dugay na man nga tig-apilan og bidding sa City Hall ang tag-iya sa Knockbox bisan dili pa sila uyab ug sa iyang anak. Aw, mao man kaha.

Akong natan-aw nga nindot ni kay anaa g'yuy nagtan-aw sa mga kuwestyonable nga transaksyon sa City Hall.

* * *

Modason ko sa panglantaw sa uban nga ang bugno sa mga kandidato pagka presidente sa eleksyon karong sunod tuig anaa ra nila ni kanhi DILG Secretary Mar Roxas ug Senador Miriam Defensor-Santiago.

Abi ninyo og ngano? Ang laing duha ka kandidato nga sila si Vice President Jejomar Binay ug Senador Grace Poe pareho nga nag-atubang og kaso nga makapaduha-duha sa mga tawo pagbotar kanila.

Labaw na kang Binay nga nasukamod na pag-ayo sa mga survey. Diha nga sibaw pa kaayo ang dungog-dungog nga modagan pagka presidente si Mayor Rodrigo Duterte, kusog ang iyang ngalan.

Apan diha nga si Duterte mitataw na g'yud nga dili na siya modagan, bisan ang akong mga higala, miingon nga kon dili sila Roxas, adto na lang sila ni Miriam.

Dunay uban nga magpanagana 'sab ni Miriam kay nakadungog man gud sila nga may sakit kini nga cancer ug basin dili makatiwas sa termino kon padag-on.   Basta, kitang mga botante angay gayud nga mopili og kandidato nga dili corrupt ug bansay na nga modumala sa atong nasud.

* * *

Duna ko'y higala sa Kapitolyo nga mitug-an nako nga naproblema g'yud diay tawon si Gov. Junjun Davide kay daghang mga botante sa Mandaue ang dili mapunta niya.

Kini tungod kay si Konsehal Lolypop Ouano-Dizon nga midagan pagka mayor sa Mandaue didto man nakig-alyado sa kontra ni Davide nga si Winston Garcia.

Anugon g'yud kaayo ang mga dumadapig sa mga Ouano nga adto na mopusta kang Winston. Ang rason niini kay ang Liberal Party mipili man ni Kongresista Luigi Quisumbing nga maoy ilang kandidato pagka mayor sa Mandaue ug ikontra ni Lolypop.

Namati ko sa kinalit-kalit nga radio survey sa usa ka programa aron pag-ila kon kinsa ang sikat nga kandidato pagka mayor sa Mandaue, biya kaayo si Luigi ni Lolypop.

Dinhi kaha sa dakbayan sa Sugbo no? Maayo tingali nga may survey 'sab nila ni Tommy Osmeña ug Mike Rama apan kinahanglan nga dili ipahibawo daan.