Bana gigukod og sundang sa asawa

CEBU, Philippines - Bana gisulong sa iyang asawa nga nagdala og sundang diha sa gitrabahoan niini tungod sa pagduda nga nakigkita kini og laing babaye kagahapon sa udto diha sa E. Chavez sa Barangay Lorega-San Miguel ning dakbayan.

Ang Banat News nakaakto sa panag-away sa duha (mga pangalan gipugngan sa Banat News) nga nagtan-aw kanila ang ilang grade 5 nga anak lalaki nga naghilak.

Naputol lang ang komprontasihay sa duha dihang  nakaagi ang usa ka patrol car sa Cebu City Public Safety Company ug mihunong kini dihang nakakita sila nga nagdala og sundang ang bata ug gipasakay ang manag-inahan.

Ang bana diha na maabti nagpungko kilid sa usa ka building apan pagkakita niini sa patrol car luwan sa asawa mikaratel kini og dagan ug wala maabti.

Ang anak sa magtiayon nabantayan sa Banat News nga maoy labihang naapektahan tungod sa pagsige niini og hilak ug mibahad nga maghikog kun dunay dautang mahitabo sa iyang amahan.

Ang manag-inahan gidala ngadto sa Barangay Lorega-San Miguel sa Gender Awareness and Development (GAD) aron tukion ang problema sa magtiayon. (BANAT NEWS)