Sige ang dakop, padayon ang palusot

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Angay'ng pagakpakan ang atong mga awtoridad tungod sa gihingusgan nila'ng kampanya pagsumpo sa ginadili'ng drugas. Tungod niini daghan ang nasakmit nga shabu, marijuana ug uban pa.

Sa mga awtoridad nga gitahasan paghingusog sa kampanya pagsumpo sa ginadili'ng drugas, maoy nag-una sa labing daghan nga nadakpan ug nasakmit nga drugas ang National Philippine Police (PNP) ug mao usab ang nag-una sa labing daghang napasakaan og kaso.

Daghan sa mga pusher ang nadakpan ug gibalhug sa bilanggoan nga ang sagad kanila gitanggong karon sa bilanggoan human gipasakaan og kaso'ng pagpamaligya og shabu sa korte.

Samtang daghan na ang nadakpan ug nabalhug sa bilanggoan human sa gihingusgang operasyon sa atong mga awtoridad, ingon sa makapahibulong kaayo nga daghan lang gihapon ang nalambigit sa paggamit ug pagpamaligya og ginadili'ng drugas.

Nagpasabot lang kini nga samtang kusog ang pagpanakop sa atong kapolisan wala usab magpalupig ang mga nalambigit sa maong ilegal nga kalihokan sa ilang pagpayuhot sa drugas.

Hinuon ang marijuana dili na katingad-an ang tinubdan tungod kay mahimo man kini'ng itanom sa mga yuta sa kabukiran dinhi sa Sugbo.

Apan ang shabu nagkinahanglan kini og laboratoryo alang sa paggama niini. Kun walay laboratory sa Sugbo nga buhatanan og shabu, dako kaayo ang posibilidad nga gikan kini sa laing dapit gawas sa Sugbo nga gipalusot lang dinhi sa ato.

Kun gikan kini sa laing lalawigan duha lang ang nahimo'ng agianan sa pagdala og shabu dinhi sa Sugbo. Kini mao ang pagkarga sa mga sakyanan sa kadagatan nga modunggo sa atong mga pantalan o gidala kini pinaagi sa ayroplano nga motugpa dinhi sa  atong tugpahanan nga nakalusot taliwala sa higpit nga pagbantay sa mga awtoridad.