Sikyu kasohan, German i-cremate

CEBU, Philippines - Ang security guard nga mipusil patay sa German national nga si Hans Jurgen Hesse, 60, human maalai nga kawatan posibleng mag-atubang og kasong homicide ugmang adlawa sa Cebu Provincial Prosecutor’s Office.

Si Sr. Insp. Wilson Abot, imbestigador sa Provincial Investigation and Detective Management Branch, mibutyag nga ila pang gitan-aw ang investigation report aron sa pagtan-aw sa liabilidad ni Jerome Niere, 38, taga El Pardo, Boljoon.

 â€œAmo pang gitan-aw ang mga elemento sa homicide ug murder kung naa ba pero initially sa akong tan-aw homicide ni,” matud ni Abot.

Si Niere gipailawom gihapon sa kustodiya sa PIDMB apan anaa kini matanggong sa karsel sa Consolacion Police Station.

Si Insp. Crisanto Abella, hepe sa Alcoy Police Station, miingon nga nagplano ang asawa sa biktima nga si Anja Christa Barbara Hessy nga i-cremate ang patay’ng lawas sa bana sa dili pa ipauli sa gawas sa nasud.

 â€œPinaagi sa ilang interpreter ingon man to nga ipa-cremate lang nila una dad-on sa ilaha unya mo-file gyud sila og kaso,” matud ni Abella, wala pa silay nadawat nga taho kung na-autopsy na ba ang patay’ng lawas sa PNP Crime Laboratory-7.

Si Niere nasikop sa joint operation sa Provincial Investigation and Detective Management Branch, Alcoy Police Station ug Boljoon Police Station adtong Biyernes sa kaadlawon sa bukirang barangay sa Nangka, Boljoon human sa 10 ka oras nga ginukdanay.

Ang pamilya ug paryente sa suspek nitabang usab sa pagpangita kaniya human kini misibat ug gibilin ang iyang   9mm pistol sa Sola Homes Subdivision sa Barangay Guiwang, Alcoy human mapusili niini si Hesse niadtong Huwebes sa kaadlawon.

Siya nadestino sa main gate sa subdivision sa dihang nagpakitabang si Jerry Carulasan kaniya human makakita og spark sa luyong bahin sa retirement village diin didto si Hesse nga nagsul-ob og jacket nga adunay hood nga nagdagan.

Daling mibunot sa armas si Niere dayong pusil sa biktima sa pagtuo nga kawatan kini.  Gideklarar nga dead on arrival ang biktima sa Dr. Ildefonso Alcantara Memorial Hospital sa lungsod sa Dalaguete.  (BANAT NEWS)