37 ka paketeng shabu nasakmit
CEBU, Philippines - Nasakmit sa kapolisan ang 37 ka pakete nga gituohang shabu gikan sa duha ka gidudahang drug pushers atol sa buy bust operation nga ilang gihimo sa Purok Ilang-Ilang, barangay Opao, dakbayan sa Mandaue alas- 8 pasado ang takna sa miaging gabii.
Si PO1 Melvin Pelayo sa kapolisan sa Presinto 5 sa Mandaue City Police Office (MCPO) nga nagbase sa Opao miila sa duha nga nadakpan nga mao sila si Francisco Lanoy, 56 -anyos, minyo nga usa ka panday ug Lloyd Sungahid, 30-anyos nga pulos nagpuyo sa maong dapit.
Matud pa ni PO1 Pelayo nga si Lanoy maoy nahimong sentro sa buy bust operation nga gipahigayon human makompirmar ang mga taho nga nadawat sa ilang buhatan nga mga illegal niining kalihokan.
Dugang pa niya nga ang ilang police decoy maoy nipalit og shabu ngadto kang Lanoy ug sa pagtunol niini sa duha ka paketeng shabu nga balor P400 dali kini nilang gisignit.
Sa pagrekisa nga gihimo nasakmit usab ang dugang 30 pa ka gagmay nga paketeng shabu gikan sa suspek.
Samtang si Sungahid kinsa diha sa lugar nakuhaan usab og lima ka paketeng may sud nga gidudahang shabu maong giapil kini sa pagsikop. (/EIM) (BANAT NEWS)
- Latest
