Bawos sa mga Duterte
Managsama silang Bise Presidente Sara Duterte ug Philip Lustre Jr. nga nalutsan og arrest warrant sa adlawng Biyernes. Si Sara gikiha og grave threats sa Department of Justice (DOJ). Samtang si Lustre gikiha og cyber libel sa bana ni VP Sara nga si Atty. Mans Carpio.
Si VP Sara gihatagan sa kapolisan sa tibuok weekend paghikay sa iyang pag-surender sa Quezon City Regional Trial Court pagka Lunes. Si Lustre giposasan pagka Sabado dayon. Maayo na lang nga nag-amut-amot ang kaubanan sa media ug dunay abogado nga nihikay sa iyang piyansa.
* * *
Sa wala pa ikiha, si VP Sara gihatagan sa DOJ sa tanang kahigayonan pagtubag sa pasangil nga iyang gipapatay silang Presidente Ferdinand Marcos Jr., First Lady Liza Araneta Marcos ug kanhi House Speaker Martin Romualdez.
Bisan dihang napasaka nang kaso, nga sundan unta dayon og arrest warrant batok sa ordinaryong sinumbong, si VP Sara gihatagan sa korte sa tanang kahigayonan pagpanalipod sa iyang kaugalingon. Gitugotan ang giawhag nga oral arguments sa pag-insistir nga dili siya mahimong taralon sa ordinaryong korte sa samang kaso nga gituki sa Senate impeachment court.
* * *
Sa pikas nga bahin, si Lustre wala kahibawo nga gikiha diay tungod sa iyang Facebook post nga nibayad si Carpio og P300 milyones sa kanhi marines nga nangangkon nga nihatod og minaleta nga kuwarta ngadto sa mga opisyal sa gobyerno.
Gidudahang gituyo ni Carpio sa paggamit og sayop nga address ni Lustre, nga wala sab susiha sa Davao City prosecutor, maong wala kahatagi og higayon si Lustre pagtubag sa wala pa mapasaka ang kaso sa korte.
* * *
Dili na Duterte ang nagtungkawo sa Malakanyang. Maong si VP Sara napaubos sa impeachment trial ug nadutlan sa kasong kriminal. Pero iyang pagka anak ni kanhi Presidente Rodrigo Duterte, nga maoy nidoble sa suweldo sa mga polis, nakapalingkawas niya sa posas.
Ang padayong pagkontrolar sa mga Duterte sa ilang tinudlo nga mga piskal ug mga huwes sa Davao nakapasamot sa pag-apiki ni Lustre. Makapahinumdom nato sa ka-inutil sa mga institusyon pagbaraw sa laktod nga pinatyanay ug lapad nga kinawatay atol sa administrasyon sa ilang amahan. Ug makapasidaan nato unsay dangatan sa nasud ug katawhan kon makabalik sila sa palasyo.
* * *
- Latest
