Impeachment, ratings ug utang

Misulod na sa ikatulong semana ang husay sa impeachment nga kaso nga gipasaka batok kang Bise Presidente Sara Duterte.

Sa unang duha ka semana, parehas nga nipadayag sa ilang dakong pagsalig ang prosecution ug ang mga abogado sa depensa nga adto mopabor kanila ang hukom unya sa mga senador nga nagsilbing mga huwes sa impeachment court nga mao ang Senado.

Ang pangulo sa prosecution nga si Kongresista Gervelle Luistro, sa iyang interview uban ni Jessica Soho, miingon nga kadaugan na para kanila ang nagsugod ug nagpadayong husay sa kaso nga impeachment batok sa bise presidente.

Kun kadaogan naman gani kini para sa prosecution, maingon nato nga ikaduha nalang seguro nila ang pagpresentar og mga ebidensiya batok sa bise presidente kay ang mahinungdanon para kanila, nataral gayod si VP Sara sa impeachment court.

* * *

Gihusay karon sa impeachment court si Bise Presidente Sara Duterte aron hukman nga tangtangon ba siya o dili sa iyang posisyon.

Si Duterte gipili sa sobra 32 milyones ka Pilipino aron palingkuron nga Bise Presidente sa Pilipinas. Karon nga nakalingkod na, gusto siyang papahawaon  sa mga kongresista nga wala ra gani sa kumaingking ang gidakon sa boto nga ilang nakuha sa tagsa-tagsa nila ka mga distrito.

Gawas niini, sa pinakauwahing survey sa Social Weather Stations (SWS), ang Bise Presidente nakakuha og +32 porsiyento nga pagsalig kun ikomparar sa Presidente nga nakakuha og -27 porsiyento. Bisan tuod wala tay datus sa trust rating sa mga kongresista gawas sa House Speaker nga mas ubos ang rating sa pagsalig sa mga tawo ngadto kaniya kun ikomparar sa bise presidente. Wala kaha masayop ang mga kongresista sa paghukom kinsa ang tangtangon? Kun may tangtangon man sa katungdanan dili seguro ang Bise Presidente kun dili ang Presidente.

* * *

Sulod sa 40 ka tuig ug pipila ka mga presidente nga midala sa renda sa gobyerno sa Pilipinas, si Presidente Bongbong Marcos Jr. ang pinakapalautang nga miabot og P203.8 bilyones matag buwan. Mas dako pa kini sa giusa nga utang ni Presidente Noynoy Aquino III ug Rodrigo Roa Duterte.

Sa buwan sa Mayo ning tuiga ang utang sa Pilipibas anaa na sa P18.55 trilyones. P12.50 trilyones (67.37%) niini ang giutang sa Local Financial Institutions samtang P6.05 ka trilyones (32.63%) ang giutang sa gawas sa nasud. Kini matud pa sa datus sa nasudnong panudlanan. Ayaw mo paduol sa atong Presidente kay basin kamo napod unya ang iyang utangan.