Nasudnong taratitat

Gihulagway ni PCO Acting Secretary Lino Cayetano ang “combative approach” ni Press Officer Claire Castro sa pagpadangat sa mga mensahe gikan sa Malacañang ngadto sa publiko nga usa ka matang sa “bahandi” (treasure), hinungdan nga magpabilin si Castro sa Presidential Communications Office.  Bisan pa sa pamahayag ni Cayetano, dili ikalimod nga daghan ang nakasaway sa pamaagi ni Castro labi pa gayod nga aduna kini kinaiya nga pagka-insultador.  Matud pa sa usa ka netizen, “Sa ka-bastos ug ka-bakakon ni Ante Kler, dili siya angay tawgon nga nasudnong bahandi kon dili, nasudnon'g taratitat.”  Muleeng!

Maanad ra sa kalisod

Mipasalig si Presidente Ferdinand Marcos, Jr. nga hingpit ug halapad ang pagpangandam sa kagamhanan alang sa epekto sa super El Niño ug nga mas andam karon ang nasud kay sa nangagi’ng mga paghuwaw.  Ang pagpangandam sa katalagman dili makita sa mga pulong ug pasalig kon dili sa tinuoray ug tukma nga mga buhat. Basin baya inig abot na gyud sa katalagman, pahinumduman lang kita sa kagamhanan sa linya sa awit ni Max Surban nga nagkanayon, “Kanang imong ka-opaw (kalisod sa El Nino), ayaw la’g kabalaka kay madugay ma-anad ka ra.”  Madahaan!

Blue na ang ka-itom

Nabatyagan sa mga siyentipiko sa NASA nga ang umaabot nga Super El Niño nakapausab sa bulok sa kadagatan gikan sa pagka-berde (green) ngadto na sa pagka-asul (blue).    Wala hinoon ibutyag kon maayo o dautan ba kini nga panghitabo ug kon unsay epekto niini sa panginabuhi sa mga mananagat.  Makapahinumdum sa bata nga nanghambog sa iyang mga kadula nga nakaadto na siya sa lawod sa dagat diin mapasigarbohon kining mihulagaway nga, “Lawom na kaayo ang iyang naabtan kay didto na siya sa dapit diin ang dagat nag-blue-blue na sa ka-itom.”  Atala lagee!

Pangandam alang sa sunod

Gikahinangop ni Cebu Governor Pamela Baricuatro ang nagkadaghan nga personalidad nga gilambigit sa 2028 gubernatorial race bisan pa man nga nagpabilin siya’ng dili pa segurado sa iyang mga politikanhong laraw tungod kay ang iya kunong prayoridad mao ang pagpangalagad sa mga Sugbuanon.  Mora’g puno sa pagminaot kining pamahayag ni Baricuatro.  Kagaw baya kuno ang eleksyon diin kadtong maapektohan niini dili na gayod matambalan.  Kay ginaingon baya nga, “Sa dihang makalingkod na ang politiko, ang una niyang buhaton mao man ang pagpangandam alang sa sunod nga eleksyon.”  Fezteleern!

Gugma batok basura

Gituki sa konseho sa dakbayan sa Sugbo ang resolusyon nga nagtugot sa mayor sa pagpirma sa usa ka MOA tali sa dakbayan ug sa HCML Logistics Service alang sa pagkolekta ug paghakot sa mga hazardous healthcare wastes sa CCMC ug sa Guba Community Hospital gikan sa Sugbo ngadto sa Bulacan.  Daghan kaayo ang balido nga isyu nga gituki, apan gitugtan ra gihapon sa konseho ang pagpirma sa maong MOA.  Naghulagway ang gibuhat sa konseho sa pagya nga, “Kon papilion ang mga batan-on tali sa gugma ug sa tarong nga garbage disposal unit, masa pilion nila ang naulahi.” Pagkatoytoy!