Salitang ‘scam’ ni Kapunan, pinalagan ng defense team

MANILA, Philippines — “Dapat tanggalin o i-strike out sa ang pahayag ni private prosecutor Atty. Lorna Kapunan sa pagkomento nito na “P612 million scam” ang confidential funds ni Vice President Sara Duterte”.

Ito ang iginiit ni Atty. Michael Poa, isa sa mga abogado ng depensa na pinagbigyan naman ni presiding officer Senator-Judge Francis “Chiz” Escudero.

Si Kapunan pa rin ang nagprisenta sa testigo ng prosekusyon na si Commission On Audit auditor Roderick Wamil at dating nakatalaga sa COA Intelligence and Confidential Funds Audit Office (ICFAO).

“Example, ‘pag humingi ka sa nanay mo, ’Mommy pengeng 5,000 bibili ako libro. ‘Di mo ginamit para sa libro. Ginamit mo, bibili ka ng make-up o nag-date ka, anong tawag dun? In-scam mo nanay mo,” ani Kapunan.

“Pero ang ini-scam ngayon, hindi nanay. Ang ini-scam ay taumbayan. Ang worth ng scam na ‘yan ay P612 million,” ayon pa kay Kapunan.

Bago ang pahayag ni Kapunan na “scam,” tinanong niya si Wamil kung maaaring ituring na accountable officer si Duterte, na nangangahulugang siya ang mananagot kung may pagkawala ng pondo, alinsunod sa nakasaad sa isang joint circular.

Matapos ang trial, sinabi ni Poa na nais lamang niyang ma-highlight na lehitimo ang pagbibigay ng confidential fund sa Office of the Vice President ay sa Department of Education.