Visayan Electric nakakuha og ERC deferment

CEBU, Philippines — Gihimo sa Visayan Electric ang mga daliang lakang aron mapagaan ang epekto sa nisaka nga gasto alang sa kuryente nga nakapugong sa residential electricity rates alang sa Hulyo 2026 nga mosaka unta ngadto sa P17.59 kada kilowatt-hour (kWh).

Pinaagi sa deferment sa usa ka bahin sa generation costs nga giaprobahan sa Energy Regulatory Commission (ERC) gilimitahan sa distribution utility ang residential rate sa P14.90/kWh gikan sa P13.74/kWh sa Hunyo.

Matud sa utility nga alang sa usa ka panimalay nga mokonsumo og 200 kWh matag bulan ang deferred rate moresulta lang og dugang nga mga P232 sa bayranan sa kuryente niining billing cycle kumpara sa gibana-banang P770 nga pagsaka kon wala ipatuman ang maong lakang.

Ang Visayan Electric nagkanayon nga ang deferment nakapakunhod og halos 70 porsyento sa diha-diha nga pagsaka sa singil nga nakapagaan sa palas-anon sa mga konsumidor taliwala sa nagkataas nga presyo sa kuryente.

Matud usab sa utility nga ang sunod-sunod nga mga problema sa merkado ug suplay sukad pa niadtong Pebrero maoy nakapasaka sa generation costs sa tibuok Visayas Grid.

Lakip niini ang pagsaka sa transmission charges, pagtaas sa presyo sa lana sa kalibutan tungod sa mga kagubot sa merkado sa Middle East, pagtaas sa panginahanglan sa kuryente atol sa ting-init ug pagsaka sa presyo sa Wholesale Electricity Spot Market (WESM) tungod sa kakulang sa generation nga nagkinahanglan og mas mahal nga pagpalit sa spot market.

Nisamot pa ang sitwasyon sa sayong bahin sa Hulyo dihang gideklara ang red alert ug kapin sa 1,000 megawatts (MW) nga generating capacity ang nahimong dili magamit nga nisangpot sa pagsaka sa generation charges nga labing dako nga bahin sa bayranan sa kuryente ngadto sa P11.00/kWh nga labing taas sulod sa usa ka tuig.

Aron mamenosan ang epekto niini ngadto sa mga konsumidor, ang Visayan Electric nagkanayon nga ilang gipadayon ang ERC-approved cost deferment, nisulod sa Emergency Power Supply Agreements (EPSA) uban sa mga power generator aron masiguro ang diha-diha nga suplay ug gilusad niining bulana ang Competitive Selection Process (CSP) aron makakuha og mas lig-on ug kasaligan nga suplay sa kuryente sugod sa sunod tuig. — /BDB (BANAT NEWS)