Ikiha kon nakasala

Wa kaayo masabti sa mga opisyal sa siyudad ang isyu nga pangolekta og bayranan ngadto sa mga Carbon Market vendors, apil na gani nga wa makasabot si Mayor Nestor Archival.

Kada vendor sa Carbon market kuno, apil ang anaa maninda daplin sa karsada, gikolektahan kuno og bayad nga moabot og P420 kada adlaw. Pwerte kunong abuso sa mga vendor’s organization sa Carbon ug ang nangadato mao ra ang ilang mga opisyal.

Gikwenta sa mga opisyal sa City Hall nga moabot og P500 million ang makolekta sa mga vendor’s organization kada tuig gikan sa mga 3,000 ka vendors sa Carbon.

Kini maoy rason nga giimbestigar ni sa City Hall apan hangtud karon wa gyuy kalamboan kon unsay gisangpotan sa ilang imbestigasyon.

Ang Cebu City government mokolekta lang gani kuno og mga P160 million nga revenue kada tuig gikan sa mga vendors, apan ang mga grupo sa vendors mokolekta og P500 million.

Matud ni Erwin Gok-ong sa Cemvedco ug ni Maria Pino sa Cebu City United Vendors Association, nga kataw-anan ang pamahayag sa mayor.

Kon tinuod man gani nga mokolekta sa City Hall og P160 million kada tuig gikan sa regulations fees ug rental sa Carbon vendors, nganong modawat ra man sila og P50 million kada tuig nga bahin gikan sa Megawide?

Diha sa Carbon Market, dunay mga tawo nga nagpaabang og mga lantay, tulda, mga timbangan, apan dili kini pinugsanay, kon dili ka moabang, dili ka ra pugson. Unya, dili ang vendor’s organization ang nagpaabang niini, kondili, dunay mga “individual” nga maoy nakahunahuna niini nga matang sa negosyo.

Nagtuo ko nga giratsada lang sa City Hall pagkwenta nga dunay 3,000 ka vendors unya nagbayad og abang sa mga lantay, tulda, timbangan ug uban pa kada adlaw.

Ilang gikwenta nga sa usa ka tuig, apil ang bayranan nila ngadto sa ilang asosasyon, giingon nga moabot og tunga sa bilyon ka pesos ang makolekta sa mga vendors group.

Maayong ipresentar sa City Hall ang ebidensya nga ang mga vendors nagbayad gyud og P420 kada usa, kada adlaw.

Gisusi nilang Gok-ong ug Pino ang mga nagpaabang og timbangan, tulda ug lantay. Nasayran nila nga duna lay 1,990 ka lantay nga paabangan apan dili kini mahurot paggamit.

Sa timbangan, duna lay 183 ka timbangan ug 149 ka tulta (tents) nga para paabangan ug dili usab kini mahurot sa pag-abang.

Tingali, gusto sa mga opisyal sa City Hall nga dili kaabusohan ang mga vendors, kay nagtoo sila nga ang mga opisyal sa vendors’ organization mao ra ang nagpadato sa ilang kaugalingon gamit ang mga vendors.

Nindot ang ilang kawsa, apan dili maayo kon mogamit sila sa sayop nga mga detalyi.