Babaye giluba sa tulisan

Babaye nga usa sa unom ka pasahero sa PUJ  nadunggaban sa  usa sa tulo ka mga tulisan human nagdumili paghatag sa iyang cellphone.

Nahitabo kini kagahapon sa kaadlawon diha sa taytayan sa Kinalumsan, dalan N. Bacalso Avenue barangay Duljo Fatima, dakbayan sa Sugbu.

Tulo ka samad dinunggaban sa buko-buko ang naangkon sa biktimang si Edna Mejoc, dalaga, hingkod ug residente sa Tabunok, Talisay kinsa  anaa karon giatiman sa mga doktor sa Cebu City Medical Center human gidala sa drayber  sa PUJ.

Base sa imbestigasyon sa Mambaling Police Station nasayran niadtong tungora ang biktima sakay sa PUJ nagtangag sa plaka GWP-769 nga gimaneho ni Rolando Casona gikan sa Colon ug paingon sa Bulacao.

Niadtong tungora, ang tulo ka wala mailhing tulisan sakay usab sa maong PUJ ug pag-abot sa nahisgutang lugar kalit lang mibunot og mahait nga hinagiban dayong tion sa biktima dungan sa pagdeklarar og tulis.

Giingon gipangayo sa mga tulisan ang 1100 cellphone sa biktima apan wala dayon kini ihatag hinungdan nga gihansakan ang buko-buko katulo ka   higayon sa usa sa tulo ka mga tulisan.

Milampos gyud pagkuha ang mga tulisan sa cellphone nga mikantidad og P2,000  ug giapil ang P2,000 nga kuwarta.

Samtang gitagsa-tagsa og panguha sa mga tulisan ang cellphone ug kuwarta sa laing lima ka mga pasahero nga giila nga sila si Nanneth Bastatas,  taga Minglanilla, ug gikuha ang iyang bag nga dunay pitaka sa sulod, paresan sa ariyos, ug mga ID, Geraldine Luna, dalaga nga taga Ciwac, Bulacao nakuhaan og kuwarta P2,000 ug Nokia 1100 nga gisulod sa bag.

Samtang ang ikaupat nga biktima mao si Lord Latonio, taga Mandaue City nakuhaan og pitaka, ID, ikalimang biktima giila nga si Catherene Ceballos, residente sa Ciwac, Bulacao, cellphone ug P1,600 cash ug ang katapusang biktima mao si Roel Gabonia, minyo nga taga Bulacao nakuhaan og Sony Ericson nga cellphone nga nagkantidad og P1,800.

Human milampos ang tulo ka wala mailhing tulisan daling mikanaog sa PUJ ug nangambak ilawom sa taytayan sa nahisgutang  lugar.