Cebu City nangandam sa kalag-kalag

CEBU, Philippines — Nangandam  na ang Kagamhanan sa Dakbayan sa Sugbo ilabi na ang Cebu City Transportation Office (CCTO) ug Department of Services sa pagdumala sa trapiko, paglimpyo ug pagmentinar sa kahapsay sa mga sementeryo sa umaabot nga pag-obserbar sa Kalag-Kalag.

Matud ni Kenneth Siasar, kinsa tigpamaba ni Mayor Nestor Archival nga giandam na sa CCTO ang traffic management plan alang sa matag sementeryo, lakip na ang mga ruta sa trapiko, mga lugar nga dili agian, mga bawal nga likoanan, designated parking areas ug mga dapit nga tugotan ang pagbaligya sa mga mamaligyaay.

Gipahibalo usab ni Siasar nga mokabat sa 553 ka personnel ang ipakatap alang sa Kalag-Kalag. Lakip niini ang 187 ka traffic field post personnel, 109 ka traffic personnel, upat ka sweeper, tulo ka clamp personnel, 18 ka mobile patrol personnel, 10 ka deputized personnel sa Land Transportation Office (LTO), ug 25 ka personnel sa engineering.

Dugang pa niini, mangayo usab ang CCTO og tabang gikan sa mga barangay tanod ug force multipliers aron mapalig-on ang pagdumala sa trapiko.

Samtang, nagpadayon na ang Department of Public Services (DPS) sa pagpanglimpyo sa mga sementeryo ug pag-andam sa paghipos sa mga basura human sa kalihokan.

Ang PROBE usab motabang sa pagdumala sa mga mamaligyaay aron masiguro nga hapsay ang ilang pagpwesto sa mga baligya apan bawal maninda sa mga sidewalks ug karsada.

Sa bahin sa parking, gipasabot sa CCTO nga dili tugotan ang pagsulod sa mga pribadong sakyanan sa mga sementeryo, gawas sa Cempark sa Barangay Banilad.

Ang mga sakyanang ilegal nga giparking sa daplin posibleng ma-clamp o ma-tow.

Sa pikas bahin, gipahibalo sa Police Regional Office 7 mokabat sa 3,255 ka mga polis nga ipakatap sa nagkadaiyang sementeryo sa tibuok Central Visayas aron sa pagsiguro sa kalinaw ug kahapsay atol sa pagsaulog sa Undas o Kalag-Kalag.

Matud pa ni PLt. Col. Rolan Aliser tigpamaba sa PRO7 nga sugdan ang deployment sa mga polis sugod  Oktubre 31 hangtud Nobiyembre 3, diin magtinabangay ang PNP, Armed Forces of the Philippines (AFP), Bureau of Fire Protection (BFP), Philippine Coast Guard (PCG), Disaster Risk Reduction and Management Office (DRRMO), ug uban pang kaubang ahensiya ug stakeholders.

Base sa datos, mokabat sa 356 ka sementeryo sa rehiyon ang bantayan, ang 272 niini mga pampublikong sementeryo samtang 82 ang pribado.

Kabahin sa seguridad, higpit nga ipatuman ang mga lagda sulod sa mga sementeryo ug gidili ang pagdala og mga deadly weapon o makamatay nga armas, ilimnong makahubog, ug paggamit og mga loud sound system nga mahimong makasamok sa publiko.

Giawhag ang publiko nga mosunod sa mga lagda ug mga pahimangno sa kapulisan aron malikayan ang dili maayong insidente ug masiguro ang malinawon nga paghinumdom sa ilang mga minahal. (BANAT NEWS)