NBA GMs mipili sa Spurs isip kampiyon, Wemby isip MVP

CEBU, Philippines — Si Victor Wembanyama ug ang San Antonio Spurs gitagna nga mosakmit sa 2027 title ug ang French superstar koronahahang Most Valuable Player sa usa ka NBA team general managers survey nga gipagawas kagahapong adlawa.

Sa ika-25 nga edisyon sa tinuig nga survey, mitubag ang mga general managers sa 48 ka pangutana. Wala hinoon sila tugoto nga moboto sa kaugalingong miyembro sa ilang koponan.

Ang Spurs, nga napildi sa New York Knicks sa miaging NBA Finals niadtong Hunyo, maoy gipaboran nga makampiyon sa umaabot nga season human makakuha og 50 porsiyento sa boto gikan sa 30 ka ehekutibo.

Misunod ang Oklahoma City Thunder nga adunay 43 porsiyento, samtang nakadawat usab og mga boto ang Knicks ug Philadelphia 76ers, ang bag-ong koponan ni LeBron    James.

Sa miaging tuig, ang Oklahoma City maoy nanghawod sa maong survey diin 80 porsiyento sa mga GMs mipili sa Thunder nga molangkat sa kampiyonato.

Ning higayona, gilupig sa Spurs ang Thunder sa pagpili sa labing maayong koponan sa Western Conference.

Sa Eastern Conference, ang New York maoy labing inilog, gisundan sa Philadelphia.

Si Wembanyama, ang No.1 overall pick sa 2023 NBA Draft ug 2024 Rookie of the Year, nag-una sa walo ka nagkalainlaing kategoriya sa survey bahin sa mga players.

Ang 7-foot-4 nga sentro, nga nakadaog sa Defensive Player of the Year award sa miaging season, gipaborang mahimong sunod nga MVP sa NBA human makakuha og rekord nga 77 porsiyento sa boto sa mga general managers.

Ikaduha si Nikola Jokic sa Denver Nuggets, ang Serbian center ug tulo ka higayon nang MVP sa NBA, nga nakakuha og 10 porsiyento sa boto.