Road Warriors, Beermen milampaso sa ilang mga kontra

CEBU, Philippines — Ang NLEX Road Warriors ug San Miguel Beermen milampaso sa ilang mga kaatbang sa PBA Season 50 Governors Cup niadtong Miyerkules sa gabii didto sa Ninoy Aquino Stadium sa kaulohan.

Gipangulohan sa import nilang si  Deonte Burton, ang Road Warriors mikulata sa Titan Ultra Giant Risers, 147-115, aron pahugtan ang ilang pagkupot sa liderato sa Group A uban ang 9-2 rekord.

Si Burton mipupo og 21 puntos, siyam ka rebounds ug pito ka assists, samtang si Robert Bolick midugang og 20 puntos, lima ka rebounds ugn walo ka assists alang sa Road Warriors.

Human sa sikit nga kumbati sa nag-unang duha ka kuwarter nga miresulta sa 65-65 nga panagtabla sa halftime, ang Road Warriors nagmangtas sa second half.

Ilang gilat-an ang Giant Risers, 37-14, sa ikatulong kuwarter aron pagposte og 102-79 nga bentaha ug wala na sila molingi pansukad niadto.

Si Kevin Alas midugang og 19 puntos sa balanse kaayong ataki sa NLEX. Si LJ Gonzales mi-iskor og 17, si Rob Herndon mitali og 16 samtang si Xyrus Torres mitampo og 12 puntos.

Si Joshua Munzon mipabuto og 33 puntos samtang si Tirrell Brown mibirada og 29 puntos apan nakawang ang ilang paningkamot kay ang Giant Risers nahagsa sa 2-9.

Sa laing bahin, sila si George King ug June Mar Fajardo mibandera sa Beermen ngadto sa 135-105 nga papatikangkang sa Terrafirma.

Si King mipabuto og 44 puntos samtang si Fajardo mibubo og 13 sa iyang 25 puntos ug siyam sa iyang 12 ka rebounds sa ikaduhang kuwarter aron tabangan ang Beermen pagbali sa singko puntos nilang alkansi ngadto na sa 17 puntos nga labaw, 64-47, sa halftime.