PANOORIN: Romualdez, bakit sa infirmary at hindi sa regular cell?

MANILA, Philippines — Ipinaliwanag ni Interior Secretary Jonvic Remulla kung bakit sa infirmary ward ng New Quezon City Jail inilagay si dating House Speaker Martin Romualdez matapos itong ilipat mula sa Philippine General Hospital (PGH).

Ayon kay Remulla, kailangan pa ring bantayan ang kalagayan ni Romualdez dahil sa kanyang hypertension, diabetes at dating cerebrovascular incidents.

“Because of his high blood pressure and his diabetes and others, nasa medical supervision pa siya, kasi mayroon siyang evidence of prior cerebrovascular incidents na kailangang i-monitor din,” ani Remulla sa isang press briefing nitong Martes, Setyembre 15.

Sinabi niyang sinusunod lamang ng mga awtoridad ang rekomendasyon ng PGH at Sandiganbayan sa paglalagay kay Romualdez sa infirmary ward.

Nilinaw din ni Remulla na hindi air-conditioned ang naturang ward.

Mananatili aniya roon si Romualdez hanggang maging “fit” itong ilipat sa regular cell, “kasama ng mga senators” at iba pang detainees.

Inilipat si Romualdez mula PGH patungong New Quezon City Jail sa Payatas nitong Lunes ng gabi, Setyembre 14.

Itinakda naman ng Sandiganbayan Third Division ang arraignment at pre-trial ni Romualdez sa Miyerkules, Setyembre 16.

Nahaharap ang dating House speaker sa kasong plunder kaugnay ng umano’y P7.44 bilyong kickbacks mula sa mga proyekto ng gobyerno sa imprastraktura.