PHO dunay katin-awan sa pasangil batok Badian District Hospital

CEBU, Philippines — Mihatag og katin-awan ang Cebu Provincial Health Office (PHO) sa mga alegasyon gikan sa pamilya sa usa ka 18-anyos nga biktima sa aksidente sa motorsiklo nga nag-ingon nga nalangan ang pag-atiman ug pagbalhin sa pasyente ngadto sa lain nga ospital samtang didto pa kini sa Badian District Hospital.

Ang maong isyu misikat sa social media human magmantala ang usa ka sakop sa pamilya sa ilang kasinatian atol sa pagtambal sa batan-ong biktima, kinsa naaksidente sa Badian niadtong Hulyo 26.

Gireklamo sa pamilya nga kulang ang medikal nga suporta nga nadawat sa pasyente ug dugay usab ang pagpa-refer niini ngadto sa laing pasilidad.

Sa pakighinabi sa media, mipasabot si Dr. Jenina Canoy, PHO Chief of Hospital I, nga dihadiha silang nagpahigayon og imbestigasyon aron susihon ang nahitabo.

"So, immediately after that, we conducted an investigation with the PHO as well as our chief of hospital in the Badian District," matod ni Canoy.

Suma ni Canoy nga alas-4 sa kaadlawon gidala ang pasyente sa Badian District Hospital pinaagi sa local emergency responders ug sa inisyal nga assessment, nasuta nga adunay samad sa wala nga bahin sa agtang, nagsuka og dugo, adunay kadaut sa ulo ug adunay kahuyang sa wala nga bahin sa lawas.

Segun sa unang assessment sa doktor posible kining traumatic brain injury (TBI). Busa, gihukman nga kinahanglan kining ibalhin ngadto sa tertiary hospital tungod kay infirmary hospital lamang ang Badian District Hospital.

Gihimakak sa PHO ang alegasyon nga paracetamol lamang ang tambal nga nadawat sa pasyente.

Matud pa ni Canoy, gawas sa intravenous paracetamol, gihatagan usab kini og mannitol aron mapakunhod ang pressure sa utok, normal saline solution, oxygen support, padayon nga suctioning tungod sa pagsuka og dugo, ug tranexamic acid.

Matud usab sa PHO, sa pag-abot sa pasyente sa ospital wala pa ang bisan kinsa sa iyang pamilya. Tungod niini, gisunod sa medical team ang ilang referral protocol pinaagi sa pagpakig coordinate una sa mga government hospital nga adunay kapasidad sa pag-atiman sa mga kaso sa traumatic brain injury.

Si Public Health Consultant Dr. Nikki Catalan mipadayag nga una nilang gipadad-an og referral ang Vicente Sotto Memorial Medical Center, Cebu South Medical Center ug Cebu Provincial Hospital-Carcar. Gumikan sa hangyo sa pamilya, gipadad-an usab og referral ang Chong Hua Hospital ug Perpetual Succour Hospital.

Kabahin sa alegasyon nga nalangay ang referral tungod sa pagkawala sa internet, giingon ni Catalan nga nagpadayon gihapon ang ilang healthcare personnel sa pagproseso sa referral pinaagi sa paggamit sa mobile data sa ilang cellphone ug uban pang gadgets.

Dugang pa sa PHO, migikan ang ambulansya nga nagdala sa pasyente mga alas-8 sa buntag bisan wala pa mahuman ang pormal nga pagdawat sa maong referral. Matud usab ni Catalan, samtang nagbiyahe na ang ambulansya, ang pamilya maoy nakahukom nga dad-on na lamang ang pasyente sa Sacred Heart Hospital.

Didto kini naabot mga alas-11 sa buntag ug gideklarang namatay alas-4:30 sa hapon sa maong adlaw.

Giinsister sa PHO nga ang tanang medikal nga lakang nga gihimo sa Badian District Hospital ug ang referral process adunay mga dokumento.  MEL BANAT NEWS