Mental health hotline ilusad sa siyudad sa Mandaue

CEBU, Philippines — Gitinguha sa Mandaue City Government nga ilusad karong Septiyembre ang usa ka mental health hotline nga motabang sa mga residente nga nag-atubang og mga kabalaka sa pangisip, dungan sa pagsaulog sa Suicide Prevention Month.

Gihisgutan ang plano atol sa miting niadtong Biyernes, Hulyo 17, tali ni Mayor Thadeo “Jonkie” Ouano ug sa mga trainer gikan sa National Center for Mental Health (NCMH), nga sila Gretchen Abejuela, Marc Neil Francilo ug Justine Fernandez.

Matud sa mga representante sa NCMH, kon matuman ang target nga paglusad sa hotline, mahimong ang Mandaue City ang unang local government unit (LGU) sa Visayas nga adunay serbisyo alang sa mental health.

Sumala ni Ouano, ang inisyatiba gitumong aron matabangan ang nagkadaghang mga tawo nga nag-atubang og mga hagit sa ilang kahimsog sa pangisip pinaagi sa paghatag og sayon nga paagi sa pagpangayo og tabang.

Miingon usab ang mayor nga ang mga personnel nga motubag sa mga tawag sa hotline kinahanglan una nga moagi og pagbansay ug mahimong kwalipikado sa pagtimbang-timbang sa kahimtang sa mga motawag sa dili pa kini pormal nga mapadagan.

Dugang pa niya, siguruhon sa city government nga adunay igo ug angay nga kagamitan aron hapsay nga madawat ug ma-assess sa mga responder ang matag tawag sa higayon nga molihok na ang hotline.

Si Nino Dargantes, representante sa Mandaue City Substance Abuse and Mental Health Services Office (MCSAMHSO), miingon nga ang mga psychometrician nga maoy motubag sa hotline nakahuman na sa pagbansay kabahin sa pagdumala sa mga tawag nga may kalabutan sa mental health distress.

Human sa miting, gihatagan ni Ouano og certificate of appreciation ang mga trainer sa NCMH isip pagpasalamat sa ilang suporta sa pagpangandam sa siyudad alang sa pagpatuman sa maong programa. (CEBU NEWS)