Cebu greats nagpanikad na sa ilang home games

CEBU, Philippines — Nagsakay sa pito ka sagunson nilang daog, ang Cebu Greats MJAS Zenith Trading mopadung sa giatngan nilang duha ka sagunson nga home games sa Maharlika Pilipinas Basketball League (MBPL) nga taas ang kompiyansa ug puno sa kadasig.

Sa labing nindot nilang salida sukad sila mipail ning rehiyonal nga liga niadtong 2018, ang Cebu kausa lamang mapildi sa miagi nilang13 ka duwa aron duyogan ang Gensan Warriors sa kinatas-ang dapit sa South Division standings sa nagpadayong SportsPlus MPBL Season 8 bitbit ang parehong 14-3 win-loss rekords.

Suyawan sa Cebu pag-angkon ang solong liderato sa dihang ilang sangkaon ang Biñan Tatak Gel (13-3) karong Huybes, Hulyo 16, didto sa Hoops Dome sa dakbayan sa Lapu-Lapu.

Mao kini ang unang home sa Cebu sukad ang team, nga kanhi nailhan pa nga Cebu Sharks, mipukan sa GenSan Warriors, 72-66, niadtong Disiembre 14, 2019 sa Aznar Coliseum.

Nakahatag kini sa Greats og dugang motibasyon aron mohimo og impresyon sa ilang mga fans nga naghandum makakita kanila nga mopakita'g aksiyon duwa atubangan sa ilang mga mata.

Ug andam na kaayo ang Greats nga mopakita sa labing nindot nilang duwa ilabi na ang mga homegrown players nga gipangulohan sa way pagbahar nga si Dondon Hontiveros ug anak niining si Ice.

Sila si JR Quiñahan, Andrey Armenion, Ron Dennison, JJ Gesalem, Brylle Meca, Elmer Echavez, Kint Ariar, ug Dolan Adlawan nagpanikad na sab nga manalipod sa ilang korte ug makahatag og garbo sa ilang mga katagilungsod.

Si coach Junthy Valenzuela makalaum sab nilang Jun Manzo, Mark Meneses, Ichie Altamirano, Dhon Reverente, Simon Camacho, CJ Payawal, Alvin Baetiong, ug Aldrin Morante aron mopainit sa ilang opensiba. Human sa Biñan, ang Cebu mosakbang sunod batok sa Batang Kankaloo, nga ikaduha karon sa North Division uban ang 14-2 nga baraha, karong Sabado, Hulyo 18, sa Cebu Coliseum.

Ang tickets nagkantidad og P100 sa upper box, P200 sa lower box, ug P400 sa courtside alang sa mga duwa sa Hoops Dome, ug P100 sa general admission, P200 sa lower box, P300 sa upper box ug P400 sa stage seats alang sa July 18 double-header sa Cebu Coliseum.

Mapalit ang mga tickets online pinaagi sa Cebu Greats Facebook page o direkta sa binyu sa adlaw sa duwa.