Sumabong usa na ka unified champion Midugang sa OPBF Silver minimumweight title sa iyang WBO AsPac belt

TAGBILARAN CITY - Si Joseph “The Hunter” Sumabong sa PMI Bohol Boxing Stable mibuntog sa kanhi way pilding Taiwanese nga si Jheng Ciou aron mamahimong usa ka unified regional champion atol sa main event sa “Kumong Bol-Anon XXV” niadtong Sabado, Hulyo 11, dinhi sa Fr. Patrick Barder Gymnasium sa Holy Name University (HNU).

Human sa 10 ka hugna nga binukbokay, ang tulo ka mga judges miiskor og 99-90,  98-91, ug 97-92 pabor tanan ni Sumabong, nga midugang sa Oriental and Pacific Boxing Federation (OPBF) Silver minimumweight belt ni Ciou sa iyang korona isip World Boxing Organization (WBO) Asia-Pacific champion.

"Lig-on kaayo ako kontra. Iya gipakita nga champion pud siya. Thank you Ciou for giving me a good fight," matud pa ni Sumabong, nga nagkupot na karon og  11-1 rekord uban ang 5KOs. Si Ciou naparot sa unang higayon sa 11 ka away uban ang usa ka tabla ug 8KOs.

Sa supporting main event, si International Boxing Federation (IBF) Asia light flyweight champion "Sugar" Shane  Gentallan (15-1, 7KOs) miposte og  unanimous decision nga kadaogan batok sa bisitang Chinese nga si Xiaokang Song (6-4,1KO).

Sa laing makalingaw nga sangka, si IBF Asia flyweight champion Leonard "The Dreamer" Porres III miinat sa perpekto niyang marka ngadto sa 11-0 uban ang 7KOs human gipiog niya ang beteranong si Renoel Pael (24-17-2, 12KOs) pinaagi sa UD.

Sa laing bahin, ang mga Sugboanon nga sila si Christian "The Punchtian" Balunan ug Reymart "Cebuano Assassin" Tagacanao yanong mipatikangkang sa tagsa-tagsa nila ka nga kontra.

Ang garbo sa lungsod sa  Consolacion nga si Balunan mi-knockout Arvin John Sampaga sa oras nga 2:53 sa ikaupat nga hugna.

Samtang si Tagacanao, lumad gikan sa Barangay Napo, dakbayan sa Carcar, mipahagba ni Jessie Bell Goltiano sa oras nga 59 segundos sa ikatulong hugna.

Si Balunan miinat sa iyang marka ngadto  sa 14-1 uban ang 9KOs, samtang si Tagacanao nagtangag na og 13-1 rekord uban ang 11KOs.

Sila si Balunan ug Tagacanao parehong pambato sa Villamor Boxing Gym ubos sa paggiya ni Edito "ALA" Villamor, kanhi two-time world title challenger nga nahimong tighulma og mga kampiyon.

Sa ubang mga resulta sa laing malampuson nga promosyon ni  Atty. Floriezyl Echavez Podot, si Jericho Acaylar (4-0, 2KOs) milupig ni Michael Adolfo pinaagi sa unanimous decision, si Sugarey Leonard Pores (9-2, 6KOs) midaog sab pinaagi sa UD  batok ni Venjie Patac, samtang si Dryxz Russel Sardalla mihimo og impresyon sa iya pro debut pinaagi sa pagpa-undang ni Jethro Illusorio sud lamang sa duha ka hugna.