Romais, Tan Chun Bing inakay UST sa panalo
MANILA, Philippines — Nagsanib puwersa sina Jyrah Romais at setter Andreaj Tan Chun Bing upang akayin ang University of Santo Tomas sa panalo kontra Arellano University High School, 25-16, 25-12, sa simula ng 2026 Shakey’s Juniors National Invitationals na nilaro sa Playtime FilOil Arena sa San Juan, kahapon.
Nakitaan ng determinasyon ang UST ng dominahin nila ng todo ang AU dahil sa matikas na laro nina Romais at Tan Chun Bing sa tournament na suportado ng Shakey’s Pizza Parlor, Peri-Peri Charcoal Chicken, Potato Corner, at R and B Milk Tea.
Kumana ang reigning Shakey’s Girls Volleyball Invitational League (SGVIL) Rising Stars Cup Division 1 Best Setter na si Tan Chun Bing ng 11 excellent sets para sa UST kaya naman impresibo ang unang laro nito sa inaugural international tournament.
Pinamunuan ni Romais ang opensa para sa UST sa tinikadang six points mula sa tatlong kills at tatlong service aces, tig-lima ang binakas nina Ciarra Calfoforo at Eliz Menchavez habang tatlo ang kinana ni Tan Chun Bing lahat ay galing sa service line.
Ipinakita ng Junior Tigresses ang kanilang bangis sa sets 1 at 2 kung saan ay nakalamang agad sila ng malaki sa simula ng paluan dahilan para panghinaan ng lakas ang Lady Braves.
Nagpasiklab din ang Guam-based Pacific Volleyball Academy nang pagpagin nila ang Pusong Azul, 25-23, 17-25, 15-7 sa tournament na katuwang ang Jetour, Baic, Eurotel, Victory Liner Rent & Go, F2 Logistics, Summit Natural Drinking Water, PusoP.com at Smart Sports.
- Latest
