DOH: Limitahan ang kalihokan sa gawas

CEBU, Philippines — Ang Department of Health-7 niawhag sa publiko kagahapon nga i-minimize ang mga kalihokan sa gawas ug magsul-ob og N95 nga face mask kong mogawas kini gumikan sa ash fall human sa pagbuto sa Mt. Kanlaon.               

Si Dr. Joshual Brillantes, direktor sa DOH-7 nitumbok sa problema kalabot sa giingong panic buying sa face masks diin iyang giklaro nga ang pagpundo sa sulod sa balay ang labing maayong proteksiyon batok sa exposure sa volcanic ash.

Girekomendar ni Brillantes ngadto sa mogawas sa ilang panimalay ang pagtarong og sul-ob sa N95 o KN95 nga face mask diin maghatag kini og mas maayo nga proteksiyon batok sa pino nga airborne particles.

Gipadayag ni Brillantes nga ang kasagarang health risk gikan sa volcanic ash exposure mao ang respiratory illness gumikan ang mga pino nga particles pwede kining mahingos paingon ngadto sa baga.

Gawas niini, ang ash fall makamugna kini og mga iritasyon sa panit, mata, ilong ug tutunlan gumikan sa sulfur content niini.

Gitumbok usab niya nga ang volcanic emergencies maka-trigger usab kini sa mental ug emotional stress ngadto sa mga apektadong residente.

Si Brillantes nipahimangno usab kini sa vulnerable groups sama sa mga puya, kabataan, senior citizens, adunay hubak ug ubang respiratory diseases, cancer patients ug adunay chronic nga sakit nga likayan ang pag-expose ngadto sa ash falls aron malikayan ang mga komplikasyon.

Nunot niini, ang Office of the Civil Defense (OCD)-7 ni-convened sa Regional Disaster Risk Reduction and Management Council-7 alang sa emergency meeting kagahapon human sa ash fall gikan sa pagbuto sa Mt. Kanlaon nga nakaapekto sa mga parti sa Sugbo.

Tumong sa maong tigom mao ang pag-assess sa impact ug pag-coordinate sa tubag sa mga hingtungdang ahensiya sa gobiyerno.         

Samtang ang opisyales sa DOST-PAGASA ug Philippine Institute of Volcanology and Seismology (PHIVOLCS) nagkanayon nga ang ash fall nga nakaapekto sa Sugbo human sa pagbuto sa Mt. Kanlaon kagahapon gilaoman nga ma-clear kini karong adlawa.

Si Engineer Al Quiblat, hepe sa PAGASA Visayas nagkanayon nga ang trajectory modeling sa ahensiya nagpakita nga ang gibuga’ng abo sa bulkan sa pagbuto niini kagahapon sa alas 7:30 sa buntag gilaoman nga moabot sa Sugbo mga alas 11:30 sa buntag ug nag-irog kini paingon ngadto sa Leyte sa human sa unom ka oras nga nakalabay

Si Mariton Antonia Bornas, hepe sa Volcanic Monitoring and Eruption Prediction Division of the Phililppines Institute of Volcanology and Seismology nitumbok sa report kalabot sa isog nga baho sa sulfur ang nasinati sa mga residente sa mga parti sa Sugbo human sa pagbuto sa bulkan.

Matud ni Bornas nga ang maong baho gumikan sa sulfur dioxide gikan sa Mt. Kanlaon ang nadala sa hangin paingon sa Sugbo.

Gikataho nga ang lain-laing parti sa Probinsiya sa Sugbo ang kompirma nga nakasinati og volcanic ashes ug ubang  mga lugar ang nakasinati og baho sa sulfur dioxide. 

Ang pag-uwan gilaoman nga makabanlas sa sulfur dioxide gikan sa kawanangan ug hinay-hinay kining makauswag sa kalidad sa hangin.

Subay niini, ang Environmental Management Bureau-7 nagkanayon nga ang ash falls gilaoman nga mosaka ang concentration sa PM10 (Particulate Matter 10) ug Total Suspended Paticulates (TSP) sa hangin hinuon sa ulahing monitoring wala pa’y nakita nga ang pollution nilapas na sa safety standards.  Gikan sa The Freeman/BDB BANAT NEWS