Dominican Republic sinisiw ng USA
MANILA, Philippines — Mabilis na ginupo ng USA ang naghihingalo at wala pang panalong Dominican Republic, 25-20, 25-19, 25-12, sa Volleyball Nations League (VNL) women’s week 2 na nilaro sa Philsports Arena sa Pasig City kahapon.
Ipinagpatuloy ng mga Kana ang kanilang pamamayagpag dito sa Pilipinas ng paluin nila ang pangatlong sunod na panalo at ilista ang 4-1 record sa VNL.
Pinamunuan ni Jordan Thompson ang iskoran para sa USA, kumana ito ng 15 points mula sa 13 kills at dalawang service aces para tapusin ang Dominican Republic sa loob lamang ng 80 minuto.
Sinindihan ni skipper at setter Jordyn Poulter ang atake ng American netters upang tulungan ang USA na iposte ang 43-31 bentahe sa attack points sa simula ng VNL na suportado ng Philippine Sports Commission (PSC) sa pamumuno ni chairman Patrick “Pato” Gregorio.
Kumana rin si Logan Eggleston ng 10 points lahat galing sa attacks, bumakas si Dana Rettke ng limang puntos para sa USA.
Nagtala lamang ng tig- dalawang service aces ang bawat teams, bagama’t lamang ang Dominican Republic sa statistical sa reception, 69-46 at sets 104-94, nakontrol pa rin ng mga Amerikano ang laban.
Para kay Thompson may ilalabas pa ang kanilang koponan sa laro, natutuwa ito dahil mabilis mag adjust sa laban ang kanyang mga kakampi.
“Practicing, training and just trying to gel together as a group, since it was a new roster,” ani Thompson. “It wasn’t always pretty, but I think what we do really well is finding ways to grit through it, even when it’s not exactly how we want it,”
Samantala, tinalo naman ng Canada ang Netherlands, 20-25, 25-19, 25-17, 25-20.
- Latest
