“Mangingilad” nga vendors walay nipasaka og kaso

CEBU, Philippines — Naglisod ang mga kapulisan sa Dakbayan sa Sugbo sa pagpasaka og kaso sa giingon nga mga ilegal nga mamaligyaay og sabon panglaba sa daplin sa kalsada tungod kay way pormal nga nipasaka og reklamo o kaso batok nila.

Gitug-an ni Cebu City Mayor Nestor Archival nga una niya nga nadawat ang taho pinaagi sa usa ka text message gikan sa mga motorista niadtong Sabado, Mayo 30, 2026 ug dali kini niya nga gisusi.

Tuod man iyaha gyud silang naaktohan diha sa Barangay Lahug maong iyaha silang gikompronta ug gibadlong.

Gimandoan niya ang hepe sa Cebu City Police Office nga si Police Colonel George Ylanan nga aksyonan ang reklamo tungod sa ilang modus sa nagkadaiyang interseksyon sa dakbayan.

Gipasusi niya kang Ylanan ang iyang live video kay nakita didto ang plate number nga gigamit nga sakyanan sa grupo.

Ang grupo nga gilangkoban og 18 ka miyembro gidala sa presinto ug gikuhaan sa ilang mga personal nga impormasyon alang sa dokumentasyon.

Apan ang mayor nagkanayon nga gipahimangnuan siya ni Ylanan nga lisod mapriso ang mga suspetsado kun walay complainant nga andam mopasaka og kaso.

Nakumpirmar sa kapulisan nga sila taga Caloocan City.

Gihulagway ni Archival nga makailad gyud ang modus sa grupo pinaagi anang pagpangayo kunohay nila sa ID sa mga biktima ug kuhaan og litrato ug mangangkon nga paryente kini ug hinabion hangtud nga dalitan sa ilang mga giingong libre nga produkto apan mangayo gihapon og bayad o mamugos sa pagpangayo og hinabang.

“Naa silay skill, either ang tawo malumay unya mopalit o mahadlok mopalit,” suma pa ni Archival.

Si Archival nagkanayon nga gihatagan na og written warning ang grupo nga dili na sila pabalikon dinhi, kung sa sunod mobalik sila dinhi, pangdakpon na sila — IBM BANAT NEWS