Larawan ng pamilya Degamo, mapa ng bahay nakuha sa ex-pulis

MANILA, Philippines — Kinumpirma ng Philippine National Police (PNP) na ang narekober ng mga awtoridad na mga larawan at mapa ng bahay ng pamilya ni Negros Oriental Gov. Roel Degamo ay mula sa dating pulis na si Negil Electona.

Ayon kay PNP Spokesperson Col. Jean Fajardo, bukod sa matataas na baril at pampasabog, nakuha rin kay Electona ang mga larawan ng pamilya ni Degamo at sketch plan, larawan ng bahay ng gobernardor kaya  pinaniniwalaang pinagplanuhan ang pagpatay.

Sinabi naman ni PNP Public Information chief PCol. Redrico Maranan na tuluy-tuloy ang pagkalap ng mga ebidensiya na magtuturo kung sino ang mastermind.

Nabatid na ang pagsalakay sa lugar ni Electona sa Amparos Village, Gravador Residence sa Barangay Villareal sa Negros Oriental ay nagresulta sa pagkakakumpiska ng iba’t ibang mga baril, explosives at libong ammunitions.

Si Electona ay nagsisilbing chief security officer ng sugar mill na pagmamay-ari ni dating governor Pryde Teves.

Sinabi naman ni Justice Secretary Jesus Crispin Remulla na naglaan ng lugar si 3rd District Negros Oriental Rep. Arnolfo Teves Jr. sa mga suspek bago isagawa ang assasination.

“It was a place controlled by the Teves family where these armed men were staying,” ani Remulla.